IIM qyzmetiniń aımaqtardaǵy ókilderi bir kúnde 3 jalǵan terrorızm faktisin anyqtady, dep jazady Egemen.kz.
Sondaı jalǵan qońyraýdyń biri Qulsary qalasynyń 22 jasar turǵynan túsken. Boıjetken evakýasııalanǵan turǵyndardy qarýly top kepilge alyp, aqshalaı syıaqy talap etip otyrǵanyn habarlaǵan.
Polısııa habarlamany tekserip, negizsiz qońyraý ekenin anyqtady.
«Oblystyq PD ekstremızmge qarsy is-qımyl basqarmasynyń qyzmetkerleri qabyldaǵan sharalar nátıjesinde Beıneý kentinde jalǵan qońyraý shalǵany úshin 22 jastaǵy qyz ustaldy. Sonymen qatar onyń buǵan deıin avtobýsta uıaly telefon urlaǵany anyqtaldy. Qoldy bolǵan gadjetten ol qońyraý shalǵan.
Qazirgi ýaqytta kúdiktige qatysty bóten múlikti urlaý jáne terrorızm aktisi týraly kórineý jalǵan habarlaý faktileri boıynsha sotqa deıingi tergeý júrgizilip jatyr», delingen oblystyq polısııa departamentiniń habarlamasynda.
Sol kúni Aqtóbe oblysynyń turǵyny da Grıshın kóshesindegi úıde bomba ornatylǵany týraly aıtqan. Polısııa bul aqparattyń rastalmaǵanyn málimdedi.
Aqtóbe oblysy PD ekstremızmge qarsy is-qımyl basqarmasynyń qyzmetkerleri buryn da osyndaı qylmys úshin sottalǵan Aqtóbe qalasynyń jumys istemeıtin turǵynyn mas kúıinde ustady. Oǵan qatysty terrorızm aktisi týraly kórineý jalǵan habarlaǵany úshin qylmystyq is qozǵaldy.Jalǵan terrorızmniń úshinshi faktisi Almaty qalasynda tirkeldi. Onda qaladaǵy jeke kompanııalardyń biriniń telefonyna WhatsApp messendjeri arqyly iri aqshalaı syıaqy úshin saýda ortalyǵyna bomba qoıý týraly usynys kelip túskeni aıtylǵan.
Jedel-izdestirý is-sharalaryn ótkizý barysynda Taldyqorǵan qalasynyń 9 jasar turǵyny anyqtaldy. Ol ınternet jelisinde kompanııanyń jarnamasyn kórip, buzaqylyq nıetpen osy habarlamany joldaǵan.
Kámeletke tolmaǵan balanyń ata-anasy balany tárbıeleý sharalaryn qabyldamaǵany úshin ákimshilik jaýapkershilikke tartyldy.
Quzyrly organdar QR Qylmystyq kodekstegi osy qylmys úshin 5 myń AEK (bul 18 mln teńgeden astam) mólsherinde aıyppul ne bolmasa bes jylǵa deıin bas bostandyǵyn shekteý nemese bas bostandyǵynan aıyrý kózdeletinin taǵy da eske salady.