2024 jyldyń 4 aqpanynda Pavlodar oblysy aýmaǵyndaǵy «Maıqaıyńaltyn» ken ornynda 4 adam mingen avtobýs oıyqqa qulap, apat bolǵan edi. Oqıǵa ornynan eki adamnyń máıiti tabyldy, al qalǵan ekeýi iz-tússiz joǵaldy. Astana qalasynyń mamandandyrylǵan aýdanaralyq ákimshilik soty tótenshe jaǵdaıǵa kináli adamdardy anyqtady, dep habarlaıdy Egemen.kz.
Apattyń sebebin anyqtaý maqsatynda arnaıy komıssııa quryldy. Tergeý qorytyndysy boıynsha tótenshe jaǵdaıǵa jumys berýshi kináli dep tanyldy.
Alaıda «Maıqaıyńaltyn» AQ bul sheshimge moıynsunbaı, Astana sotyna qarsy shaǵym túsirdi.
Sot isti tekserý barysynda oıyqtyń paıda bolý sebepterin anyqtady:
1. Talapkerdiń jumysty erejege saı uıymdastyrmaýy; «Maıqaıyńaltyn» AQ jaýapty tulǵalary taý-ken jumystaryn júrgizý barysynda óndiristik qaýipsizdikti baqylamaýy;
2. Taý-ken jáne geologııalyq barlaý jumystaryn júrgizetin qaýipti óndiristik obektiler úshin ónerkásiptik qaýipsizdikti qamtamasyz etý qaǵıdalaryn buza otyryp, bloktardy ıgerý kezinde jumys oryndarynan qulaý prosesine tıisti baqylaýdyń bolmaýy;
3. Talapkerde ken ornyn ıgerý kezinde taý-ken agregattaryn (bloktaryn) ıgerý jobalary bolmaǵan (ázirlengen joq).
Osy jáne ózge de mán-jaılar sotta zerttelgen tergeý materıaldary, onyń ishinde saraptama uıymdary men komıssııalardyń qorytyndysymen rastalady.
«Apat «RCSH PVASS» JShS qyzmetkerleriniń qyzmettik mindetterin oryndaý kezinde, ıaǵnı, jumys ýaqytynda boldy. «Maıqaıyńaltyn» AQ jaýapty tulǵalarynyń áreketsizdiginen bolǵan apatqa 100 paıyz talapker kináli dep tanyldy. Osyǵan baılanysty sot Tótenshe jaǵdaılar mınıstrligine qarasty Eńbek komıteti men О́nerkásiptik qaýipsizdik komıtetine qatysty talap aryzdy qanaǵattandyrýdan bas tartty», dep habarlady Astana sotynyń baspasóz qyzmeti.
Sot sheshimi zańdy kúshine engen joq.