Sý basqan óńirlerden jaqynda ǵana oralǵan depýtattar Úkimetke halyqtyń ótinish-tilegin jetkize bastady. Búgin ótken Májilis otyrysynda Rınat Zaıtov kózimen kórip kelgen ahýaldy baıandap, halyqtyń shyǵynyn óteýdiń júıeli algorıtmi qurylmaǵannan azamattar áli de alańdaýly ekenin aıtyp, Oljas Bektenovtyń atyna depýtattyq saýal joldady, dep jazady Egemen.kz.
Májilismen búgingi saýalyn halyq sózi dep qabyldaýdy surady. Ol bıylǵy sý tasqyny tabıǵı apat retinde sıpattalsa da, adamı salǵyrttyqtyń da bar ekenin joqqa shyǵarmady.
«Tosynnan kelgen topan sýdy qansha jerden tabıǵı qubylys desek te, apatqa kináli adamı salǵyrttyqtar da bar. Dálelimen aıtsaq, Atyraý oblysy men Qulsary qalasynyń mańynan zańsyz salynǵan sý bógetteri, jergilikti bıliktiń kóktemgi sý tasqynyna álsiz ázirlengeni, syn saǵatta abdyraǵan jurttyń áreketin úılestire almaýy da osyndaı saldarǵa ákelip soqty», dedi Rınat Zaıtov.
Depýtat jaqynda parlament kýlýarynda kóterilgen máselege jete kóńil bólmeýdiń de saldary tıgenin ashyq aıtty. Májilismenderdiń atynan sóz alǵan depýtat: «Prezıdentimiz aıtqandaı, jaýapkershilik alýdan qashyp, jumysty bir-birine siltep otyratyn qyzmetkerler men jergilikti iri kompanııalar jazalaný tıis», dedi.
Sondaı-aq depýtat memleket tarapynan kórsetiletin kómektiń júıeli josparyn ázirlep, halyqqa túsindirýdi usyndy.
«Apat saldarynan zardap shekken halyq óz shyǵyndary qalaı eseptelip, qalaı óteletinin áli de tolyq bilmeıdi, óıtkeni, bul sharalardyń naqty algorıtmi jasalmaǵan, Komıssııa qalaı qurylyp, qalaı jumys jasaıtyny jaıly halyqqa durys habarlanbaǵan. Sol sebepten Komıssııa jumysyn jeńildetip, halyqpen tikeleı baılanystyrý maqsatynda onyń quramyna el senimine ıe bolǵan jergilikti belsendi azamattardy qosý kerek dep esepteımiz. Apat bolǵan aımaqtardyń turǵyndaryna ýaqytsha nesıelik kanıkýl qarastyrýdy suraımyz. Sonymen qatar baspanasynan aıyrylǵan azamattardy ońtaıly ornalastyrýdy jedeldetýdi suraımyz», dedi depýtat.
Rınat Zaıtov Úkimetten ot pen sýda temirdeı tózimdilik tanytyp jatqan halyq senimine selkeý túsirmeýdi, olardyń talap-tilegin oryndaýdy surady.
«Tózim men birliktiń arqasynda biz bárimiz burynǵy bıliktiń jaqtastary jasaǵan qastandyqty da, memleket tutastyǵyn buzǵysy keletin saıqal saıasattaryn da iske asyrýǵa jol bermeı kelemiz. Bul – uly erlik! Endigi kezekte arsyz arandatýdyń jeteginde ketpeı, judyryqtaı jumylyp, táýelsizdikti saqtaý jolynda malyn da, janyn da qurban etip jatqan, halyqtyń talap-tilegi tıisti deńgeıde oryndalady degen úmittemiz», dep túıindedi Rınat Zaıtov.