Elimizde otbasylyq zorlyq-zombylyq – keń taraǵan jat qylyq. Oǵan fızıkalyq, psıhologııalyq, ekonomıkalyq nemese jynystyq zorlyq-zombylyq jatady. Sondyqtan turmystyq zorlyq-zombylyq úshin qatań jazaǵa tartý máselesi qashanda qoǵam nazarynda.
Árbir úshinshi otbasyna turmystyq zorlyq-zombylyq derekteri bolyp jatyr. Mundaı statıstıkalyq málimetter, otbasy isi jónindegi sarapshylardyń pikiri, petısııa, mıtıngtermen dáleldenip, dáıektelip otyrdy. Qabyldanǵan zań – adamdardyń quqyqtary men erkindigin qorǵaýǵa ári memleketti demokratııalandyrýǵa baǵyttalǵan qadam.
Elimizdiń 12 óńirinde 19 daǵdarys ortalyǵy bar. Ortalyqtyń negizgi maqsaty – turmystyq zorlyq-zombylyqqa tap bolǵan áıelderdiń quqyqtary men balalardyń qaýipsizdigin qamtamasyz etý. Bul salada 25 jyldan beri qyzmet etip kelemin. «Áıelderdiń quqyqtary men balalardyń qaýipsizdigi» zańynyń qurylýyna biz de qatysyp, jumys tobynda boldyq. Endi zań aıasynda otbasyndaǵy zorlyq-zombylyq, áıelge nemese balaǵa qol kóterip, kúsh jumsaý ákimshilik isten qylmystyq iske kóshirildi. Eger qylmystyq is qozǵalsa, onda zorlyq kórsetýshi bas bostandyǵynan aıyrylady, oǵan aıyppul salynady. Osy turǵyda zorlyq kórsetýshige aıyppul emes, ony sottalý merzimine basymdyq berilgeni durys boldy. Sebebi bul otbasylyq qarjyǵa da baılanysty.
Sondaı-aq qujat negizinde sottyń sheshimimen zorlyq kórsetýshi adamdar psıhologııalyq korreksııadan ótýi múmkin. Zań aıasyndaǵy bul tájirıbeniń qalaı iske asyrylatynyn baqylaıtyn bolamyz. Daǵdarys ortalyqtarynda otbasylyq zorlyq-zombylyqtan zardap shekken áıelderge psıhologııalyq kómek pen bilikti zańgerler keńes beredi. Ortalyqta qajetti barlyq kómek kózi qarastyrylady. Ortalyq sońǵy 5 jylda osy másele aıasynda arnaıy saraptama men monıtorıng júrgizedi. Daǵdarys ortalyqtary aýyl turǵyndarymen de etene baılanysyp, olarǵa da kómek kórsete alady.
Zúlfııa BAISAQOVA,
Daǵdarys ortalyqtary odaǵynyń basshysy