Májilistiń Áleýmettik-mádenı damý komıtetinde ótken otyrysta Týrızm jáne sport mınıstrliginiń ókili el sportshylarynyń Parıj olımpıadasyna kıetin kıim úlgisin tanystyrdy, dep jazady Egemen.kz kaz.inform.kz-ke silteme jasap.
Sport jáne dene shynyqtyrý isteri komıtetiniń tóraǵasy Erbol Myrzabosynovtyń málimetinshe, arnaıy komıssııaǵa 15 uıymnan ótinish kelip túsken.
Azııa oıyndaryndaǵy sportshylardyń kıim sapasyna kelip túsken shaǵymdardan keıin osy joly formaǵa erekshe nazar aýdarylǵan. Olımpıada oıyndary kezinde Fransııa astanasynda 40 gradýsqa deıin ystyq bolýy yqtımal. Sondyqtan sarapshylar parad úlgisindegi kıimderdi yńǵaıly matadan ári jeńsiz tigýdi uıǵarǵan.
«Eń birinshi nusqa — Tý ustap shyǵatyn Aslanbek Shymbergenov pen Nadejda Dýbovıskaıanyń kıimi. Ekeýi de ulttyq naqyshta tigiledi. Er adamnyń kıiminde bórik bolsa, qyzda sáýkele bar. Er sportshylardyń basynda taqııa, qyzdar formasynyń bir úlgisinde shalbar, ekinshi nusqasynda beldemshe bolady. Eki nusqasy da qarastyrylǵan», dedi Erbol Myrzabosynov.
Komıtet basshysy el sportshylyarynyń kıim úlgisi marapattaý rásiminde kıetin toptamamen tolyqqanyn atap ótti. Jańa toptamanyń da er jáne áıelderge arnalǵan nusqasy qatar tigiledi.
«Sportshylarǵa yńǵaıly bolý úshin sheteldik brend Joma-dan tolyq 16 nusqaly kıim alyp beremiz. Ony sportshylar jolda, daıyndyq kezinde kıedi. Bul - sapaly kıim tigetin halyqaralyq brend. Azııa oıyndarynyń qorytyndysy boıynsha, sportshylardyń talap-tilekterine taldaý jasap, sonyń negizinde halyqaralyq brendke tapsyrys berdik. Sportshylardyń formasy demeýshilerdiń esebinen tigiledi. 15 nusqadan osy úlgi tańdap alyndy. Endi tige bastaımyz», dedi Erbol Myrzabosynov.
Aıta ketsek, arnaıy forma sportshylarǵa tórtjyldyqtyń basty alamanyna 35 kún qalǵanda úlestiriledi.