Búgin Senatta ǵylym jáne bilim berýdi jetildirýge arnalǵan zań qaralǵany málim. Otyrys barysynda Scopus bazasyna enetin halyqaralyq ǵylymı jýrnaldarǵa maqala jarııalaý týraly talap doktorlyq dıssertasııa qorǵaýǵa kedergi keltiretini jóninde otandyq ǵalymdardyń pikiri nazarǵa alyndy. Ǵylym jáne joǵary bilim vıse-mınıstri Darhan Ahmed-Zakı sol turǵyda jumystar qolǵa alynǵanyn atap ótti. Osyǵan baılanysty Palata Tóraǵasy otandyq ǵalymdar úshin sheteldik basylymdarǵa materıal jarııalaý ońaı emes ekenin tilge tıek etti. Sondaı-aq ol jalpy ǵylymǵa qoıylatyn talapty tómendetpeý kerek ekenin aıtty, dep habarlaıdy Egemen.kz Senattyń baspasóz qyzmetine silteme jasap.
«Ǵylym jan-jaqty zerttelgen qadamdy talap etedi. Sondyqtan PhD-di qorǵaýǵa arnalǵan krıterıılerdi tómendetýge bolmaıdy. Bolon júıesine kósherdiń aldynda mundaı olqylyqtyń bolǵanyn bilemiz. Sol kezeńde kandıdattar men doktorlardyń kóbeıip ketkenin jáne olardyń qalaı qorǵalǵanyn kórdik. Sol sebepti, ondaıǵa qaıta oralmaý úshin PhD-di óz deńgeıinde ustap otyrýymyz qajet. Jeńil jolmen qorǵaǵan on PhD-den góri bir-eki naǵyz ǵalymdy tárbıelep shyqsaq, eldiń ǵylymyna da, ekonomıkasyna da kóbirek úles qosatynymyz anyq. Sondyqtan burynǵy qatelikterimizden sabaq alyp, onyń qaıtalanýyna jol bermeýimiz kerek», dedi Máýlen Áshimbaev.
Sondaı-aq Senat Spıkeri ǵalymdarymyz shetelde de qurmetke ıe bolýy kerek ekenin aıtyp, mundaı deńgeı joǵary talaptan bastalatynyna nazar aýdardy. Onyń paıymynsha, tıisti mınıstrlik atalǵan baǵyttaǵy jumystardy jan-jaqty pysyqtap, aldaǵy ýaqytta da júıeli túrde jalǵastyra berýi kerek.
Aıta ketsek, búgin Senat otyrysynda «QR-nyń keıbir zańnamalyq aktilerine ǵylym jáne bilim berý máseleleri boıynsha ózgerister men tolyqtyrýlar engizý týraly» Zań qaralyp, maquldandy. Jańa normalar ǵalymdardyń áleýmettik kepildikterin jaqsartýǵa jáne ǵylymda qarjy resýrstaryn paıdalanýdy ońtaılandyrýǵa baǵyttalǵan.