Tasqyn sýdan zardap shekkenderden birjolǵy kómek boıynsha qujattar qarqyndy túrde qabyldanyp jatyr. Alaıda baspanasynan aıyrylǵan turǵyndar memleket tarapynan qajetti materıaldyq qoldaý bolmaı qalýy múmkin dep alańdap otyr. Bul máseleni senator Ásem Rahmetova kóterdi, dep habarlaıdy Egemen.kz joǵarǵy Palatanyń baspasóz qyzmetine silteme jasap.
Zardap shekkendermen kezdesý barysynda qıraǵan nemese sý basqan úılerdegi múlikke qatysty zalaldyń mólsherin dáleldeý keıbir adamdarǵa qıynǵa soǵatyny týraly suraqtar jıi qoıylady. О́z múlkin resmı tirkep úlgermegender, sondaı-aq saıajaılarda úı salǵandar da qıyn jaǵdaıda qalyp otyr.
«Sý basqan eldi mekenderdegi úılerde jalǵa turyp jatqandar memleketten beriletin birjolǵy ótemaqyǵa qol jetkize almaıdy. Esepshottary buǵattalǵan turǵyndarǵa beriletin birjolǵy ótemaqy bankter tarapynan kredıttik qaryzdy jabýǵa ustalyp qalady. Senat depýtattarymen kezdesýlerde evakýasııa pýnktterindegi jergilikti turǵyndar atalǵan mańyzdy máselelerdi kóterdi jáne respýblıkalyq deńgeıde oń sheshim izdestirý boıynsha kómek kórsetýdi surady», dedi senator Ásem Rahmetova.
Depýtat osyǵan baılanysty zalaldy óteý qaǵıdalaryna ózgeris engizýdi, atap aıtqanda, sý tasqyny kezinde tolyq qıraý nemese joǵaltý sebebinen baǵalaý júrgizý múmkin emes turǵyn úı úshin zalaldy óteý tetigin ázirleýdi, sondaı-aq turǵyn úıden bólek, qurylystarǵa jáne múlikke kelgen zalaldardy, onyń ishinde sý tasqyny kezeńinde joǵalǵan zalaldy óteýdi engizýdi usyndy.
«Saıajaı ýchaskelerinde tirkelgen jáne turatyn azamattarǵa kelgen zalaldy óteý tetigin qarastyrýdy, tótenshe jaǵdaı saldarynan zardap shekkenderge kelgen zalaldy óteýge qujattardy berý merzimin 30-dan 60 kúnge deıin qaıta qaraýdy, jeke ne bolmasa memlekettik turǵyn úı qorynan jalǵa beriletin úılerde turatyn azamattardyń múlkine kelgen zalaldy óteý tártibin aıqyndaýdy usynamyn. Sondaı-aq tótenshe jaǵdaı kezinde shottary buǵattalǵan turǵyndar úshin arnaıy shottar ashý kózdelsin», dep Ásem Rahmetova depýtattyq saýalyn túıindedi.