Bıyl Almatyda jergilikti «sakýra» - órik gúldemegen. Qazir sáýir aıy jartysynan aýsa da, qala turǵyndary jaınap, jaıqalǵan jemis aǵashtaryn áli baıqamaǵan, dep jazady Egemen.kz.
Dendrologııalyq zerthananyń aǵa ǵylymı qyzmetkeri Svetlana Nábıeva tengrinews.kz ınternet resýrsyna bergen suhbatynda tabıǵı aqaýdyń sebebin úsik shalýmen baılanystyrdy.
«О́rikter qazir gúldemeıdi, óıtkeni úsik shaldy. Almatyda temperatýra aýytqyp turdy. Birde kún jylynyp, artynsha qar jaýdy. Sosyn qaıtadan temperatýra nólden joǵarylaı bastady. Kóptegen ósimdik mezgilge beıimdelgendikten, turaqsyz aýa raıyna óte sezimtal keledi. Múmkin, keıbir jerlerde biren-saran gúldeıdi, biraq bıyl jappaı gúldep turǵan órik aǵashyn kórmeısiz», dep túsindirdi dendrolog.