Memleket basshysynyń áıel quqyǵy men bala qaýipsizdigin qamtamasyz etetin zańdarǵa qol qoıǵany jónindegi habardy qýanyshpen qarsy aldym. Zańdarǵa áıel men balaǵa qatysty kez kelgen sıpattaǵy zorlyq-zombylyq úshin jaýapkershilikti qatańdatatyn, sondaı-aq otbasy ınstıtýtyn, kámeletke tolmaǵandardyń qaýipsizdigin nyǵaıtatyn normalar engizilgen.
«Áıel bir qolymen besikti, ekinshi qolymen álemdi terbetedi» degen sóz bosqa aıtylmaǵan. Otbasyndaǵy yntymaq-birlik pen jarasymdy tirshilik áıelge tikeleı baılanysty. Qaı úıde áıel ózin jaıly, baqytty sezinse, únemi kúlip-oınap, kóterińki kóńil-kúımen júrse, ómirine rıza bolsa, sol úıde jarasymdylyq ta, molshylyq ta, baq-bereke de turaqtaıdy. Ondaı úıdiń er-azamaty árqashan tabysty bolyp, tárbıelep ósirgen ul-qyzdary da jaqsy adam bolyp ósedi. Sol sııaqty qaı elde áıeldiń quqyǵy tolyq qorǵalyp, genderlik teńdik saltanat qursa, sol eldiń mádenıeti kemeldenip, ǵylym-bilim, tehnologııa men ónerkásibi alǵa basyp, ekonomıkasy qýatty, qoǵamy turaqty bolyp jatyr.
Sol sebepti Prezıdent Qasym-Jomart Toqaevtyń bastamasymen qabyldanyp otyrǵan zań elimizde genderlik teńdiktiń nyǵaıýyna jáne otbasylyq zorlyq-zombylyqtyń tyıylýyna áser etedi dep senemin. Túptep kelgende bul qujattyń qabyldanýy Qazaqstandy adam quqyǵy tolyq qorǵalatyn, qaýipsiz, órkenıetti elge aınaldyrý jolyndaǵy mańyzdy qadam bolmaq.
Gúljahan SAILAÝQYZY,
pedagog