Qasym-Jomart Toqaev pen Sadyr Japarovtyń tóraǵalyǵymen Qazaqstan men Qyrǵyzstannyń Joǵary memleketaralyq keńesiniń altynshy otyrysy ótti, dep habarlaıdy Egemen.kz Aqorda baspasóz qyzmetine silteme jasap.
Memleket basshysy qazaq-qyrǵyz qatynastary strategııalyq seriktestik rýhynda damyp kele jatqanyn atap ótti.
«Biz odaqtastyq baılanysty nyǵaıtýdy qolǵa aldyq. Búgin biz tarıhı kelisimge qol qoıamyz. Osy mańyzdy qujat qazaq-qyrǵyz qatynastarynyń damýyna tyń serpin beretinine eshqandaı kúmán joq. Sondyqtan biz bul kelisimge úlken úmit artyp otyrmyz. Oǵan bizdiń múmkindigimiz de, ynta-jigerimiz de jetkilikti. Joǵary memleketaralyq keńestiń otyrysy yntymaqtastyq aıasyn keńeıtýge jol ashady dep sanaımyz», dedi Qasym-Jomart Toqaev
Prezıdent búgingi otyrys barysynda eki el yntymaqtastyǵynyń ózekti máseleleri talqylanatynyn aıtty.
«Ýaqyt synaǵynan ótken yqpaldastyǵymyzdyń bolashaǵy zor ekenine kámil senemin. Bul baǵytta bir kisideı kúsh jumyldyrýymyz qajet. Osy oraıda Joǵary memleketaralyq keńestiń jumysy qazaq-qyrǵyz qarym-qatynastaryn damytýǵa erekshe serpin beretinine senimdimin», dedi Memleket basshysy.
О́z kezeginde Qyrǵyzstan Prezıdenti san alýan baǵyt boıynsha seriktestikti odan ári nyǵaıtý mańyzdy ekenin jetkizdi.
«Búgingi is-shara qyrǵyz-qazaq qatynastaryn odan ári nyǵaıtýǵa yqpal etedi dep oılaımyn. Kelissózderdiń dástúrli odaqtastyq jáne strategııalyq baılanys rýhynda ótip jatqany qýantady. Qyrǵyzstan Qazaqstanmen ekijaqty baılanystardy tereńdetýge baǵyttalǵan syrtqy saıasat júrgizip otyr. Bir-birimizdi qoldap, keleshekti oılap, barlyq máseleni birlesip sheshken durys dep sanaımyn. Qyrǵyzstannyń atqarýshy bılik organdary eki el arasyndaǵy Joǵary memleketaralyq keńestiń sheshimderin iske asyrý úshin tıisti sharalardy júzege asyryp jatyr. Búgingi kezdesýlerimiz eki eldiń ózara yntyqmaqtastyǵyna tyń serpin beretinine senimdimin», dedi Sadyr Japarov.
Prezıdentter búgingi talqylaýlardyń tabysty bolǵanyn, ekijaqty yqpaldastyqtyń basymdyqtary men aldaǵy mindetteri aıqyndalǵanyn atap ótti.
Qasym-Jomart Toqaev pen Sadyr Japarov Qazaqstan men Qyrǵyzstan arasyndaǵy qatynastardy múlde jańa deńgeıge kóterýge ózara nıetti ekenin aıtty.
Sonymen qatar jıyn barysynda saýda-ekonomıkalyq, kólik-logıstıkalyq, sý-energetıkalyq jáne mádenı-gýmanıtarlyq salalardaǵy yntymaqtastyq máseleleri qarastyryldy.
Jıynda Qazaqstan Premer-mınıstriniń orynbasary Serik Jumanǵarın, Qyrǵyzstan Mınıstrler kabıneti tóraǵasynyń birinshi orynbasary Adylbek Kasymalıev, Qazaqstannyń Kólik mınıstri Marat Qarabaev, Qyrǵyzstannyń Ulttyq qaýipsizdik jónindegi memlekettik komıteti tóraǵasynyń birinshi orynbasary – Shekara qyzmetiniń dırektory Ýlarbek Sharsheev, Qazaqstannyń Energetıka mınıstri Almasadam Sátqalıev, Sý resýrstary jáne ırrıgasııa mınıstri Nurjan Nurjigitov, Qyrǵyzstannyń Energetıka mınıstrliginiń birinshi orynbasary Nazgúl Ýsenova, Qyrǵyzstannyń Sý resýrstary, aýyl sharýashylyǵy jáne óńdeýshi ónerkásip mınıstriniń orynbasary Almazbek Sokeev, Qazaqstannyń Mádenıet jáne aqparat mınıstri Aıda Balaeva, Qyrǵyzstannyń Mádenıet, aqparat, sport jáne jastar saıasaty mınıstri Altynbek Maksýtov sóz sóıledi.