Atyraý oblysynyń Inder aýdanyndaǵy Baǵyrlaı kanaly mol sýmen tolyqty, dep habarlaıdy Egemen.kz.
«Qazsýshar» RMK Inder óndiristik ýchaskesiniń basshysy Saılaý Baıbosynovtyń aıtýyna qaraǵanda, 105 shaqyrymdyq Baǵyrlaı kanaly Batys Qazaqstan oblysymen shekarada ornalasqan.
«Inder aýdanynda tórt sýarý-sýlandyrý kanaly bar. Bul – Aqsaı, Baǵyrlaı, Alǵabas-Joryq, Quraılysaı kanaldary. Tórt kanaldyń jalpy uzyndyǵy 302 shaqyrymdy quraıdy. Onyń ishinde eń uzyny sanalatyn Baǵyrlaı kanalynyń strategııalyq mańyzy bar. О́ıtkeni, bul kanal Atyraý men Batys Qazaqstan oblystarynyń shekarasymen ótedi. 1994 jylǵy sý tasqyny kezinde Baǵyrlaı kanalyna kóp mólsherde sý kelgen edi. Qazir Batys Qazaqstan oblysynyń aýmaǵynan atalǵan kanalǵa mol sý kelip tur», deıdi Saılaý Baıbosynov.