Túrkistan oblysy Saıram aýdany Qaramurt aýylynda 49 jastaǵy áıel kúıeýin óltirdi degen kúdikpen 2 aıǵa qamaýǵa alyndy. Otasqandaryna 30 jyl bolǵan er men áıeldiń tórt perzenti bar. Eki uly men eki qyzy da kámelet jasyna tolǵan, dep habarlaıdy Egemen.kz.
Oqıǵa 12 sáýir kúni marqum men kúdiktiniń úıinde bolǵan. Týystarynyń sózinshe, er adam múmkindigi shekteýli ulyna qol kóterip, áıel oǵan arasha túsken. Sóıtip kúıeýin qylqyndyrǵan áıeli, aqyry, ony óltirdi degen kúdikpen qamaýǵa alyndy.
Kórshi-qolańnyń sózinshe, bul otbasyndaǵy alǵashqy janjal emes. Tórt balanyń anasy buǵan deıin de kúıeýiniń judyryǵynan qashyp, kórshilerdiń úıine tyǵylǵan desedi. Al er adamnyń ishimdikke táýeldi ekeni anyqtaldy.
«Spırttik ishimdikke toıǵan ákemizden biz de talaı ret qashqanbyz. Birde esikten, birde terezeden shyǵyp ketetin edik. Ákemizdiń ozbyrlyǵynan qutylý úshin ápkelerim turmysqa erte shyǵyp ketti. Men de mektepti aıaqtaı sala shetelge oqýǵa tústim. Biraq anam ákemizdi birde aryqtan, birde joldan taýyp alǵanyn aıtyp habarlasyp júrdi. Oqýdan demalysqa kelgenim sol edi jaǵdaı taǵy qaıtalandy. Men ol kezde úıde án tyńdap jatqanmyn. Sóıtsem, dalada janjal bolyp jatyr eken», deıdi uly.
Ýchaskelik polıseıdiń aıtýynsha kúıeýin óltirdi degen kúdikti 2019 jyly qorǵaýǵa alynǵan. Odan keıin polısııaǵa shaǵym túspepti. Alaıda uzaq únsizdiktiń sońy qaıǵyly jaǵdaımen aıaqtaldy.
«Mundaı qaıǵyny eshkimniń basyna bermesin. Bul otbasymen 20 jyldan beri kórshimiz. Áıeli sondaı jaqsy. Jumysyna tańerteń ketip, keshke bir-aq keledi. Al kúıeýi kóbine mas bolyp júredi. Kórgen saıyn «qoı» deıtinmin. Balalary kishkentaı kezinde urys-janjal óte kóp bolatyn. Keıin saıabyrsydy. Sóıtsek, áıeli bárin ishine jutyp júrgen eken ǵoı», deıdi otbasynyń kórshileri.
Kúdikti áıeldiń ústinen sotqa deıingi tergeý bastalyp, eki aıǵa qamaýǵa alyndy. Al alǵashynda «oǵan keshirim berdik» degen qaıyn jurty keıin oıynan aınyp qalǵan. Olar bul iske úshinshi adamnyń qatysy bar dep oılaıdy.
«Bizdińshe, aǵamyzdy áıeli jalǵyz ózi óltirgen joq. Bul jerde taǵy bir adam bar. Bárin aıtyp, qylmysqa kómektesken. Bizdiń aǵamyz qaıtys boldy. Iá, jeńgem. Biraq árkim óz jazasyn alýy kerek», deıdi marqumnyń týystary.
Al kúdiktiniń jaqyndary qudalarynyń bul oıymen kelispeıdi.
«Sińlim osy kúnge deıin kórmegendi kórdi. Biraq «uıat bolady» dep shydap keldik. Shydamnyń shegi jetken sııaqty. Ony aqtamaımyn. Bul aýyr jaǵdaı. Biraq ol adamdy tekten-tekke óltirdi degenge senbeımin. О́zin-ózi qorǵap abaısyzda jasaǵan dep topshylaımyn. Bala-shaǵasyn ósirip, endi ǵana ózine keldi me degende otbasynyń osylaı oıran bolaryn kim bilgen?», deıdi kúdikti áıeldiń ápkesi.