Aqtóbe oblysynda sý tasqyny kezinde áleýmettik mańyzy bar azyq-túlik taýarlarynyń (ÁMT) baǵasyn negizsiz kótergen 17 kásipker jaýapkershilikke tartyldy, dep habarlaıdy Egemen.kz Aqtóbe oblysy ákimdiginiń baspasóz qyzmetine silteme jasap.
Elimizde sý tasqyny kezinde oblys boıynsha monıtorıngtik toptardyń jumysy kúsheıtildi. Reıdter iri saýda oryndary men jergilikti dúkenderdi jiti baqylaýǵa aldy. Sonymen qatar baǵanyń negissiz ósýine jol bermeý úshin azyq-túlik taýarlaryna baǵa belgileýdiń búkil tizbegi boıynsha deldaldyq shemalardy tekserý jónindegi komıssııanyń jumysy kúsheıtildi.
«Monıtorıng barysynda kásipkerlerdiń osal jaǵdaıdy paıdalanyp, áleýmettik mańyzy bar taýarlar tizimine engizilgen taýarlardyń baǵasyn kóterý faktileri anyqtaldy. Atalǵan kásipkerlik sýbektilerine eskertý jáne aıyppul túrindegi ákimshilik jazalar qoldanyldy. 204-baptyń 4-tarmaǵynyń «TJQQ-da taýar stavkasynyń asyp ketýi» boıynsha 17 saýda sýbektisiniń ıeleri jaýapkershilikke tartyldy, onyń ishinde eki saýda núktesi tótenshe jaǵdaı jarııalanǵan aýmaqtarda ornalasqan. Sondaı-aq aýdandarda taǵy 4 dúken ıesine qatysty ákimshilik is qaralyp jatyr», deıdi oblystyq kásipkerlik basqarmasynyń basshysy Almas Salyqbaev.
Aıta ketsek, óńir turǵyndary úshin ÁMT baǵasynyń kóterilýi týraly habar berýge bolatyn senim telefony ashyldy.
Qyrmyzy JUMAǴALIQYZY,
EUÝ stýdenti