Biz baqytty ulandarmyz

Kez kelgen memleket kemel keleshegin óziniń jalyndy jas­tarymen, óskeleń urpaǵymen baılanystyrary sózsiz. Ata-babalarymyz biz, búgingi urpaq úshin aqtyq demi qalǵansha kúresip, tolarsaqtan saz keship, eńseli egemendikti syılady. Bul bizge buıyrǵan ólsheýsiz baqyt dep oılaımyn. Osy bir qasıetti uǵymnyń jastar sanasynda ábden bekip, olardyń bostandyqpen atqan árbir tańǵa shúkirlikpen qarap, ony qyzǵyshtaı qorǵaýyna, kózdiń aǵy men qarasyndaı saqtaýyna memleket bar múmkindikterdi jasap otyr. Tek osy jolda tartynbaı talaptanyp, erinbeı eńbektený qajet. Elbasy Nursultan Nazarbaevtyń tikeleı qoldaýymen jyl saıyn elimizde jastardyń zııatkerlik áleýetin qalyptastyratyn túrli resýrstyq ortalyqtar, uıymdar men birlestikter ashylyp, óren­derdiń jan-jaqty damýyna jaǵdaı jasalýda. Egemendik alǵannan beri bizdiń oblysymyzda da 60 shaqty jas­tar isterimen aınalysatyn uıymdar quryldy. Solardyń biri – ózim basqaratyn «Jastar bastamalary ortalyǵy» mekemesi. Búginde atalǵan ortalyqta 60-qa jýyq jas maman jemisti qyzmet etýde. Olar órenderge arnalǵan «Jastar tájirıbesi», «Dıplommen – aýylǵa!» syndy memlekettik baǵdarlamalardy júzege asyrýǵa óz úlesterin qosýda. Eńbek bırjasy arqyly eń­bek­­pen qamtylǵandar sany da jyl saıyn artyp keledi. Obly­sy­myzda túrli bilim, óner, kásip­kerlik, din syndy ómirdiń san salasynda júrgen órenderdiń oılarymen, irgeli áreketterimen sanasa otyryp, sondaı-aq, múm­kindigi shekteýli jandardyń da muń-muqtajdyqtaryn eskerip, qorytyndy shyǵaryp, birlese jumys júrgizýdi qyzmetimizdiń negizi dep sanaımyz. Al «Táýelsizdik bizge ne berdi?» degen saýal tóńireginde oıla­natyn bolsaq, eń aldymen, joǵaryda atap aıtqandaı, bas­ta­mashyl jastardyń basyn birik­tire­tin erkindik, boıymyzǵa eshkim­nen qaımyqpaıtyn jiger berdi. Taǵy bir aıta ketetin jaıt, ótken jyly «Máńgilik El jastary – ındýstrııaǵa» atty memlekettik baǵdarlamamen elimizdiń ońtústik óńirinen qazaǵy azdaý oblysymyzǵa 200 talapkerdiń kelýi kadr jetispeýshiligi sekildi máselemizdi sheship qana qoımaı, shuraıly tilimizdiń shýaǵyn keltiretin qazaq tildi jastarymyzdyń daýysyn ártaraptan estýimizge múmkindik berdi. Táýelsizdiktiń bizge, ásirese, jastarǵa bergeni saýsaqpen sanap, az sózben qaıyratyn dúnıe emes. Eń birinshiden, oı bostandyǵyn, jan azattyǵyn syılaǵan egemendiktiń ár sátine bizdiń bererimiz mol bolýy kerek. Danııar ÁBÝTÁLIP, jastar bastamalary ortalyǵynyń dırektory. Soltústik Qazaqstan oblysy.