Qarjylyq monıtorıng agenttigi tóraǵasynyń orynbasary Jeńis Elemesov sý tasqyny kezinde urlyq boıynsha qozǵalǵan qylmystyq isterdiń jaı-japsaryn aıtty, dep habarlaıdy Egemen.kz.
«Bizdiń vedomstvo gıdrotehnıkalyq qurylystardy salýǵa bólingen bıýdjettik qarajatqa qatysty 4 qylmystyq isti tirkedi. Atalǵan ister Ulytaý, Aqtóbe, Qyzylorda oblystarynda jáne Almaty qalasynda tergelip jatyr. Bul qylmystyq isterdiń basym bóligi bıýdjet qarajatyn urlaý faktileri boıynsha qozǵalǵan. Bir jaǵdaıda arnaıy osy bógetterdi kútip ustaýdaǵy zańsyz áreketter sebep boldy. Osy ister boıynsha 1 mlrd teńge shamasynda zalal keltirilgeni anyqtaldy», dedi J.Elemesov Májilis otyrysynda.
Elemesovtyń aıtýynsha, atalǵan zańsyz áreketter ótken jyldary da jasalǵan. Bul aqsha birneshe jyl buryn gıdrologııalyq nysandardy kútip ustaýǵa bólingen.
«Bul qarajat bıylǵy sý tasqynyna qarsy bólingen 140 mlrd teńgege qatysy joq. Qazir ıgerilip jatqan osy qarajattyń maqsatty jumsalýyna monıtorıng jasaımyz, ıaǵnı zańsyz áreketterge tosqaýyl qoıamyz», dedi agenttik tóraǵasynyń orynbasary.
Sondaı-aq Ulytaý, Aqtóbe, Qyzylorda oblystary men Almaty qalasynda 1 mıllıard teńgeni urlaý isi boıynsha kúdiktiler anyqtalǵany qosa habarlandy.
«Kúdikke ilingender arasynda tıisti tenderlerdi alǵan kásipkerler de, sondaı-aq oryndalǵan jumystardyń aktisine qol qoıǵan laýazym ıeleri de bar. Olar áli tutqynǵa alynbady. Sebebi atalǵan óńirlerde sý tasqyny jaǵdaıy áli de kúrdeli, keıbir adamdar sý basqan jerlerlerde qyzmet atqaryp jatyr. Qazir tek qylmystyq isterdi tirkedik jáne tergeý prosesi júrip jatyr», dep túsindirdi Jeńis Elemesov.
Qyrmyzy JUMAǴALIQYZY,
EUÝ stýdenti