IýNESKO-nyń málimetinshe, álemde 770 mıllıon eresek, 16 mıllıon jas azamat hat tanymaıdy. Bul – shamamen dúnıe halqynyń 10 paıyzy. Osy sanaqta Somalı kósh bastap tur. Munda 15 jastan dep eseptegende jurttyń 5 paıyzy ǵana mektep kórgen. Osy júıemen qaraǵanda, Chad (22%), Malı (31%), Aýǵanstan men Ortalyq Afrıka Respýblıkasy (árbiri 37%), Býrkına-Faso (39%) Gvıneıa (40%), Gvıneıa-Bısaý (42%), Serra-Leone (43%), Lıberııa (48%) bolyp kete beredi...
BUU-nyń dereginshe, álemde 6 jastan 18 jasqa deıin 244 mıllıon balanyń mektepke barý múmkindigi joq. Onyń kóbi (98 mıllıon), árıne, Afrıka memleketterinde eken.
Osy elderdegi esi kirgen ár bala álemniń ózi quralyptas balalary sekildi jaqsy mektepte oqýdy, úlgili tárbıe sińirip, qalaǵan mamandyǵyn alyp, Otanyn kórkeıtýdi armandaıdy. Qarapaıym adamı ańsar! Biz beıkúná bala armanynyń oryndalýyna tilektespiz.
Úndistannyń sanasyn ózgertken dana qaıratker Mahatma Gandı aıtqan eken: «Ulylyq máni nátıjede emes, maqsatqa jetýge tyrysýda» dep. Bizdiń Ahmet Baıtursynuly: «Ǵylym, óner artylǵan saıyn dúnıede beınet kemimekshi» deıdi. Halqyna «Pedagogıka» atty oqý quralyn amanattaǵan aqyn Maǵjan: «Balany óz kúshine ózin sendirip úıretý kerek. «Qolyńnan túk kelmeıdi» deı berseń, bala jasqanshaq, jasyq bolyp qalady. Osydan saqtaný kerek» dep jazypty.
Qarapaıym qazaq balasynyń da taza ári asqaq ańsary bar. Biz de oǵan «Armanyńa jet, aınalaıyn!» deımiz.
Eskergen IMANBAI