Qazaqstan Ulttyq Banki jasandy ıntellektti qoldanýshy alaıaqtardyń kóbeıip kele jatqanyn eskertedi. Buryndary alaıaqtar óz qurbanynyń týysy, jaqyn adamy nemese tanymal medıa-tulǵa bolyp sms-habarlama arqyly aqsha surasa, qazir sol adamnyń daýysyn salatyn bolǵan, dep jazady Egemen.kz
Adamnyń shynaıy daýysyn paıdalaný úshin qaskóıler messendjerlerdegi (WhatsApp, Telegram jáne t.b.) akkaýnttardy buzyp, daýystap aıtylǵan habarlamalardy kóshirip alyp, olardy neırondyq jelige júkteıdi, ne bolmasa daýys ózgertetin tehnologııalardy qoldanady. Keıin smartfon ıesiniń daýysy aqsha jiberýdi suraıtyn ótinishke aınalyp, daýystyq habarlama túrinde jiberiledi, tipti sol adamnyń atynan mátinmen de kelýi múmkin.
Smartfonǵa buzyp kirý úshin alaıaqtar uıaly baılanys operatorynyń tehnıkalyq qoldaý qyzmetinen dep qońyraý shalyp, telefonǵa kelgen kodty aıtýyn suraıdy. Zııan tıgizetin siltemeler balalar baıqaýyna daýys berý nemese áleýmettik mańyzy bar taqyryptarda saýalnamaǵa qatysýǵa shaqyrý túrinde de jiberilýi múmkin.
Sodan keıin aılasyn asyrýǵa kirisetin qaskóıler alaıaqtyqqa kóship, adamdardan aqsha alý úshin týysynyń, áriptesiniń, tanysynyń, qandaı da bir medıa-tulǵanyń atynan baılanysqa shyǵady.
Jasandy ıntellektiń ártúrli quralymen messendjerlerde «kúshtik qurylym ókilderiniń» (QR IIM, Bas prokýratýra jáne t.b.) atynan beıneqońyraý shalyp, azamattardy Qazaqstan Ulttyq Bankimen «birlesip jasalatyn» tólem operasııalaryna qatysýǵa úndeıdi. Áńgime barysynda rezervtelgen uıashyqtyń nemese brondalǵan qarajattyń qaǵazdary dep Ulttyq Banktiń atynan jalǵan qujat usynady. Azamattardyń senimine kirý úshin jalǵan qujattarda memlekettik organdardyń nemese jeke kompanııalardyń «ýákiletti adamy» qoıǵan qoly men onyń aty-jóni jáne basylǵan móri kórsetiledi.
Ulttyq Bank mobıldi telefondy buzyp kirýge jol bermes úshin kúdikti siltemelerge ótpeýge, telefonǵa kelgen kod pen paroldi eshkimge aıtpaýǵa jáne jibermeýge shaqyrady. Sondaı-aq Ulttyq Banktiń qyzmetkerleri messendjer arqyly aýdıo/vıdeoqońyraý shalmaıtynyn, bank qyzmetkeri bolyp qońyraý shalǵan adammen aradaǵy áńgimeni tez arada úzip, qandaı da bir sharaǵa nemese tólem operasııalaryn júrgizýge qatysýdan bas tartý kerektigin eskertedi.
Aıta keteıik, ózińiz nemese tanysyńyz alaıaqtyń qurbany bolsa, Qazaqstan Respýblıkasynyń quqyq qorǵaý organdaryna júginýge, aryz jazýǵa bolady. Keńes alý úshin 1477 qysqa nómiri arqyly Ulttyq Banktiń Baılanys ortalyǵyna qońyraý shalýǵa da bolady.