Prezıdent Qasym-Jomart Toqaevtyń tóraǵalyǵymen Qazaqstan halqy Assambleıasynyń «Birlik. Jasampazdyq. О́rleý» atty XXXIII sessııasy ótti. Memleket basshysy aıtqandaı, Assambleıa – el birligin is júzinde ornyqtyra túsetin, konstıtýsııalyq mártebesi bar qoǵamdyq organ.
Elimizde sý tasqyny bastalǵaly beri Qazaqstan halqy Assambleıasy ádettegideı belsendi ári úılesimdi jumys istep, respýblıkalyq jáne aımaqtyq shtabtary quryldy. Olar qaıyrymdylyq jáne gýmanıtarlyq kómek jınaýǵa jumyldy. Sondaı-aq jurtty qaýipsiz jerge kóshirýge atsalysty. Tabıǵı apat kezinde el birligi nyǵaıa túsip, halqymyzdyń yntymaǵy men joǵary azamattyq jaýapkershiligi osy kezde aıqyn kórindi.
Memleket basshysy sóılegen sózinde apat bolǵan óńirlerde eshkim eleýsiz qalmaıtyny, memleket shyǵyndy túgel óteıtini, tasqynnyń zardabyn joıý úshin bıýdjet shyǵystary qysqartylatyny jáne memleket qarjysyn qatań únemdeý rejimi engiziletini jóninde aıtty.
«Jol salynady, sý tartylady. Aýyldarymyz múlde jańa kelbetke ıe bolady. Jalpy, álemdegi úlken daǵdarystardyń qarqyndy damýǵa jol ashatyny belgili. Syn saǵatta judyryqtaı jumylǵan jurtymyz osy qalpynda órleý, jańǵyrý kezeńine qadam basady», dedi Q.Toqaev.
Sonymen qatar Memleket basshysy Qazaqstan halqy Assambleıasynyń múshelerin qoǵamdyq keselderge qarsy jumys isteýge shaqyrdy. Ár adamnyń oı-sanasy jáne minez-qulqy jaqsarsa, tutas qoǵam jaqsaratynyn jáne maqsat-muraty bıik bolsa, eldiń rýhy da bıik bolatynyn aıtty. Prezıdent aıtqandaı, elimizdiń myzǵymas birligin nyǵaıtyp, jasampazdyq ıgi isterdi yntalandyrýǵa, memlekettiń ekonomıkalyq jáne áleýmettik órleýine bárimiz bir adamdaı atsalysaıyq.
Sultanbek MÁKEJANOV,
Senat depýtaty