Osy kúni joba daıyndap, ár salada jańalyq ashyp júrgen mektep oqýshylary az emes. Mysaly, Qazaly aýdanyndaǵy №165 orta mektepte «Jasyl mektep» bastamasy aıasynda túrli ıdeıa týyndap, oqýshylar sol arqyly ekoónimder shyǵarýǵa den qoıǵan.
Mundaǵy jylyjaıda qııar, qyzanaq, basqa da kókónister ósirilip jatyr. Osy mekteptiń 10-synyp oqýshysy Bekzat Jańabaıuly bolashaqtaǵy «Jasyl mektep» jobasyn ázirlegen. Alda ol ekoqaldyqtardy óńdeý sheberhanasyn jabdyqtap, ósimdikterge birneshe tájirıbe jasap kórmekshi.
«Jasyl mektep» – oqýshylardy ekomádenıetke tárbıelep, mektebimizdiń aýlasyn taza ustap, kógaldandyrýdy kózdeıdi. Sonymen qatar kún jáne jel energııasyn telefon arqyly basqaryp, toq kózin únemdeýge arnalǵan jobam da bar», deıdi ol.
Aýdandaǵy úzdik jobalardyń biri – №95 mekteptiń 11-synyp oqýshysy Aqarys Qalymbettiń qoı júninen tabıǵı tyńaıtqysh jasaý bastamasy. Osydan 2 jyl buryn bastalǵan izdenis ústinde bizde kádege jaramaıtyn qoı júniniń Irlandııa elinde eksportqa shyǵarylatyn baǵaly tyńaıtqyshqa aınalǵanyn anyqtady. Oblys turǵyndary arasynda qoı júni arqyly sábiz ben kartop egip, mol ónim alyp otyrǵandar bar ekenin bildi. Jetekshisimen birlesip, qoldaǵy bar bólshekterden qoı júnin túıirshikteıtin qurylǵy jasap shyǵardy.
«Qoı júninde ósimdikterge kerekti barlyq dárýmen bar. Ony kádimgi tabıǵı gıdroponıka deýge bolady. Ol kez kelgen tyńaıtqysh ornyna júredi. Quramyndaǵy ósimdikke qajetti qorektik zattar uzaq ýaqytqa deıin shirimeıdi», deıdi izdenimpaz oqýshy.
Qyzylorda oblysy,
Qazaly aýdany