Taıaýda Astanadaǵy «Jarqyn» smart mektebiniń 3 jyldyq belesi Otan qorǵaýshy kúnine oraılastyrylyp, «Erlik – erge mura, urpaqqa uran» atty taqyryppen ótti. Is-shara eki bólimnen turdy: birinshisi – oqýshylardyń ınnovasııalyq kórmesi, ekinshisi – tanymdyq mádenı is-shara.
Innovasııalyq kórmede «Jarqyn» smart mektebi oqýshylarynyń hımııa, bıologııa, ekologııa, aqparattaný, qazaq tili, tarıh, geografııa, sýret, aǵylshyn tili t.b. pánderden jazǵan ǵylymı jobalary qoıylypty. Osynyń ishinde Esil sýyn tazalaý, kıikterdi saqtaý men laıyqty kóbeıtý, elorda kósheleriniń tarıhy, Alash tulǵalary beınesin jippen órip salý t.b. tyń jobalar is-sharaǵa qatysýshy qaýymdy aıryqsha qyzyqtyrdy. Eń bastysy, osy eńbekterdiń avtorlary óz usynystaryn júıeli, tartymdy jetkize aldy.
«Jarqyn» smart mektebiniń dırektory Dáýren Mahanov: «Qazir mektepten mekteptiń aıyrmasy – básekege qabiletti oqýshyny daıarlap, túletip ushyrýda. Biz – árqashan izdenetin, árbir oqýshynyń tamyr soǵysyn túsinetin ujymbyz. Bilim, otanshyldyq tárbıe, zamanaýı tehnologııanyń meńgertý úılesse, almaıtyn asýymyz joq. Mekteptiń ata-anamen tyǵyz baılanysta jumys isteýiniń mysaly – osy is-shara. Ár bala – bizdiń jarqynymyz» dep, ujymnyń alǵa qoıǵan maqsat-mindetin qysqasha aıtyp berdi. Mektep qamqorshylarynyń tóraǵasy Nurlan Áljanqulov: «Balasyn oılaǵan memleket, qoǵam – bolashaqqa qam jeıdi degen sóz. Biz «Jarqyn» smart mektebin quramyz, ashamyz degende, osy ıdeıamyzǵa sengen azamattar, mine, áli de janymyzda. Prezıdentimiz Ulttyq quryltaıda jas urpaq tárbıesine, bilimine, tipti qandaı kitap oqıtynyna deıin nazar aýdarýdy qatań tapsyrdy. «Jarqyn» – jas pedagogterdiń ári izdenis, ári tájirıbe alańy. Olar ár oqýshynyń qaı salaǵa beıimin erte ańǵaryp, sony damytýǵa kúsh-jiger jumsap otyr. Smart – aqyldy degen sóz. Bul aqyl ǵylymmen, sondaı-aq sportpen, ónegeli tárbıemen artady. Ata-analarǵa da erekshe rızashylyǵymdy jetkizemin!», dedi.
Tanymdyq mádenı is-sharada elordanyń birneshe mektebin basqarǵan eńbek ardageri, máslıhattyń eks-depýtaty Z.Júsipova, tehnıka ǵylymdarynyń doktory, professor Á.Báıdibekov, fılologııa ǵylymdarynyń doktory, professor D.Myqtybek, Qazaqstannyń eńbek sińirgen qaıratkeri, ánshi Q.Maqanov, mekteptiń ata-analar keńesiniń tóraǵasy B.Shoıbekov sóz alyp, Astanadaǵy baǵyty erekshe mektepke sát-sapar tiledi. Pedagog Záýre Ǵınaıatqyzy: «Jarqyn» mektebiniń aıaq alysy bárimizdi qýantyp otyr. Úsh jyl az da, kóp te emes. Eń bastysy, nátıje bar. A.Baıtursynuly «Balaǵa kóp úıretem dep asyqpaı, az da bolsa anyq, naqty úıretý abzal» degen. Ujym shaǵyn bolsa, barlyq pándi úıretý, balany jaqsy tárbıeleý aıqyn júzege asady. «Jarqyn» osyny kórsetip otyr», dedi.
Osynaý is-sharany oqýshylardyń ózi júrgizip otyrdy. Sondaı ónerpaz ul-qyzdardyń mýzykalyq tartýy, dombyra orkestriniń kúı shashýy, túrli sporttyq óner úlgileri «Jarqyn» smart mektebiniń jan-jaqty ekenin kórsetti.
Baqytjan AIDARHANULY