Búgin Shymkent qalasynyń ákimi Ǵabıt Syzdyqbekov Jeńis kúni qarsańynda Uly Otan soǵysynyń ardagerleri Muratáli Tólepbergenuly men Nına Mosýnovaǵa Memleket basshysynyń arnaıy joldaǵan Alǵysyn jetkizip, páter kiltterin tabystady, dep jazady Egemen.kz.
«Biz 9 mamyrda beıbit ómir men tynyshtyqty qorǵaý jolynda qurban bolyp, maıdan dalasynan qaıtpaı qalǵan batyrlarymyzdyń rýhyna taǵzym etemiz. Soǵys jáne tyl ardagerlerine sheksiz rızashylyq bildirip, aıryqsha qurmet kórsetemiz», delingen Prezıdent quttyqtaýynda.
Megapolıs basshysy aǵa býynnyń ekinshi dúnıejúzilik soǵys kezindegi erligi men eńbegi óskeleń urpaq úshin qaısarlyqtyń, janqııarlyqtyń jáne otanshyldyqtyń ozyq úlgisi bolyp qalatynyn aıryqsha atap ótti.
«Biz Jeńistiń qundylylyǵyn eshqashan umytpaımyz jáne bostandyq úshin qaza tapqan batyrlardyń jarqyn jadyna taǵzym etemiz. Sizderdiń boılaryńyzdaǵy erlik pen uly rýh, batyldyq pen batyrlyq bolashaq urpaq úshin tabandylyq pen patrıotızmniń laıyqty úlgisi bolyp tabylady», dedi Ǵabıt Syzdyqbekov.
Ǵasyr jasaǵan qart maıdangerler sheksiz rızashylyqtaryn bildirip, shynaıy alǵysyn jetkizdi.
Aıta keteıik, búgin Shymkentte Jeńis merekesi aıryqsha saltanatymen atalyp ótti. Ǵabıt Syzdyqbekov soǵys ardagerlerimen birge «Dańq memorıalyna» gúl shoǵyn qoıyp, Uly Otan soǵysy jyldarynda qaza tapqan jaýyngerlerdiń rýhyna taǵzym etti.
Shahar turǵyndary da «Máńgilik alaý» monýmentine gúl shoqtaryn qoıyp, marqumdardy bir mınýt únsizdikpen eske aldy.
Osy rette aıta keteıik, qala ákimi Ǵabıt Syzdyqbekovtiń tikeleı usynysymen Jeńistiń 79 jyldyǵyna oraı UOS ardagerlerine kórsetiletin kómek kólemi 1 329 120 teńgeden 2 000 000 teńgege deıin arttyryldy. Sondaı-aq UOS ardagerlerine teńestirilgen azamattarǵa 166 140 teńge tólendi. Buǵan deıin olar 132 myń teńge alǵan.
Tyl eńbekkerlerine de materıaldyq kómek kórsetildi. О́tken jyly olarǵa 41 400 teńge tólense, bıyl bul soma 55 380 teńgege ulǵaıtyldy.