Ulytaý oblysy Jańaarqa aýdanynyń ortalyǵynda jazýshy, etnograf Aqseleý Seıdimbektiń eskertkishi ornatyldy. Tulǵany tuǵyryna qondyrý jobasy halyqtyń nıetimen jáne múddeli azamattardyń qoldaýymen júzege asty. Is-sharanyń ashylý saltanatyna elimizge belgili zııaly qaýym ókilderi, ǵalymdar men aqyn-jazýshylar qatysty.
Eskertish qoladan quıylǵan. Bıiktigi – 3.9 metr. Týyndynyń avtory – elimizge belgili músinshi Talaphan Azamat. Alashtyń abyz aqsaqalynyń aıbyny asqaqtap turǵan som tulǵasy kórgen halyqtyń kóńilin toltyrdy.
Aqseleý Slanuly – sanaly ǵumyryn ult murasyn túgendeýge jumsaǵan eliniń adal perzenti. Ǵıbratty ǵalym, sańlaq sanatker, qabyrǵaly qalamger, ónegeli ónertanýshy azamat. Onyń «Kúńgir-kúńgir kúmbezder», «Oıtolǵaq», «Kúı shejire», «Myń bir marjan», «Qazaqtyń aýyzsha tarıhy» sııaqty irgeli eńbekteri – ulttyń rýhanı qazynasyn orasan baıytqan qundy jádigerler.
Eskertkishtiń ashylý saltanatynda sóz sóılegen jazýshy Beksultan Nurjekeev Aqseleý tulǵasynyń beınelenýi – búgingi kúnge emes, bolashaqqa jasalǵan rýhanı baǵdar ekenin atap ótti. «Ákemizdiń artynda qalǵan mol murany nasıhattaý sharalary týǵan jerinde únemi jalǵasyp keledi. Búginde Jańaarqa kentindegi ortalyq kósheniń biri onyń esimimen atalady. Eńseli eskertkishtiń ornaýy da onyń ónegeli ómirin alqalaǵan jurtshylyqtyń tilegi bolatyn», dedi Ernar Seıdimbek.
Is-sharanyń sońynda Aqseleý bıiginde marqumnyń rýhyna quran baǵyshtalyp, jınalǵan jurtshylyqqa qudaıy as berildi.