Keshe Astana qalasynyń qylmystyq ister jónindegi mamandandyrylǵan aýdanaralyq sotynda asa iri mólsherde alaıaqtyq jasaǵany úshin «Atameken» ulttyq kásipkerler palatasynyń burynǵy basshysy Abylaı Myrzahmetovke qatysty qylmystyq is qaraldy. Sot ony 5 jylǵa bas bostandyǵynan aıyrdy, dep habarlaıdy Egemen.kz.
Sot prosesinde Abylaı Myrzahmetovtyń 2022 jylǵy mamyr aıynan qazanǵa deıin B.-ǵa aqshalaı syıaqy úshin memlekettik jáne quqyq qorǵaý organdarynyń joǵary laýazymdy tulǵalary arqyly aǵasy B.-ty qamaýdan bosatý jáne oǵan qatysty sotqa deıingi is júrgizýdi toqtatý máselesin sheshýge múmkindiginiń bar ekendigin aıtqany anyqtaldy. Ol alaıaqtyq jasaý jolymen formaldy túrde qaryz sharttaryn resimdeı otyryp, B.-tyń asa iri mólsherde 13,9 mlrd teńge aqshalaı qarajatyn jymqyrǵan.
Sottalýshy kinásin moıyndap, ádil jaza taǵaıyndaýdy, qorǵaýshylar is boıynsha is júrgizýdi toqtatýdy surady.Sot sottalýshynyń kinásin moıyndaýyn, shyn júrekten ókinýin, ózi jasaǵan qylmysty tergeýge jáne qylmys jasaý nátıjesinde alynǵan múlikti izdestirýge járdemdesýin, kámeletke tolmaǵan balasynyń bolýyn jaýapkershilik pen jazany jeńildetetin mán-jaılar retinde tanydy. Qylmystyq jaýaptylyq pen jazany aýyrlatatyn mán-jaılar anyqtalǵan joq.A. Myrzahmetovtyń kinási sottalýshynyń óz kinásin moıyndaýymen, kýálardyń aıǵaqtarymen, qaryz sharttarymen jáne qylmystyq istiń basqa da materıaldarymen dáleldendi.
«Sot úkimimen Abylaı Myrzahmetov asa iri mólsherde alaıaqtyq jasaǵany úshin kináli dep tanylyp, jergilikti ózin-ózi basqarý organdarynda jáne kvazımemlekettik sektor sýbektilerinde 10 jyl merzimge qyzmet atqarý quqyǵynan aıyryla otyryp, memleket kirisine qylmystyq jolmen alynǵan 5,8 mlrd teńge somasynda aqsha qarajaty tárkilenip, 5 jylǵa bas bostandyǵynan aıyryldy», delingen sottyń habarlamasynda.Sot QK-niń 49-babynyń 2-bóligi negizinde Qazaqstan Prezıdentine A. Myrzahmetovti «Qurmet» jáne 3-dárejeli «Barys» ordeni memlekettik nagradalarynan aıyrý týraly usynys engizdi. A. Myrzahmetov múlkine salynǵan tyıym saqtaldy.Sot úkimi zańdy kúshine engen joq.