Eki jyl buryn Aqtaý qalasynda bastalǵan kóterme-taratý ortalyǵynyń qurylysy qarqyndy júrip jatyr. Quzyrly oryndardyń aıtýynsha, quny shamamen 3,8 mıllıard teńgeni quraıtyn bul joba ımportqa táýeldi óńirde azyq-túlik baǵasyn tómendetýge yqpal etedi.
Ortalyqta jergilikti aýyl sharýashylyǵy óndirýshilerine saýda oryndary berilmek. Bul óz kezeginde ónimdi deldalsyz satýǵa múmkindik jasap, sol arqyly tutynýshylar úshin baǵany turaqtandyrýǵa oń áser etedi. Memleket basshysy Qasym-Jomart Toqaevtyń tapsyrmasymen júzege asyp jatqan jobanyń básekelestik ortany qalyptastyrýǵa jáne taýar baǵasyn tómendetýge múmkindigi bar.
«Qazir jumystyń 90%-y oryndaldy. Jobanyń jalpy aýdany shamamen 40 myń sharshy metrdi quraıdy. Qurylystyń negizgi kezeńderi aıaqtaldy, sonyń ishinde ǵımarattyń qabattary salynyp, ınjenerlik kommýnıkasııalar tartyldy. Abattandyrý jumysy aıasynda asfalt tóselip, nysannyń aınalasy kógaldandyrylady. Joba eki kezeńde iske asyrylady: jaz bastalǵanda sýyq kameralar men tońazytqysh qoımasy, sondaı-aq qurǵaq ónimder qoımasyn ashý josparlanǵan. Ekinshi kezeńi qyrkúıek aıynda júzege asady, ıaǵnı azyq-túlik taýarlaryn jetkizetin kóterme-taratý ortalyǵy ashylady degen jospar bar», dedi kóterme-taratý ortalyǵynyń qurylysymen aınalysatyn «Aqtaý ORS» JShS dırektory Bekzat Jetkizgenov.
Nysan paıdalanýǵa berilgennen keıin pavılondarda fermerler óz ónimderin deldalsyz sata alady. Olarǵa kókónis pen jemis-jıdek saqtaıtyn qoımalar, sondaı-aq tońazytqysh pen muzdatqyshy bar kameralar beriledi. Aýyl sharýashylyǵy ónimderin deldalsyz satý halyqqa azyq-túlik taýarlaryn barynsha arzan baǵada satyp alýǵa múmkindik beredi. Ortalyqtyń maqsaty da osy.
Tolyqtaı eńserilýge jaqyn turǵan jobanyń tusaýy kesilip, paıdalanýǵa beriletin ýaqyty alys emes. Demek atshaptyrym aýmaqqa ornalasyp, alyp júkti arqalaǵan ortalyqtyń bul maqsatty qanshalyqty oryndaǵanyna kóz jetkizetin kún de alys emes.
Mańǵystaý oblysy