14 boksshymyz – jeńimpaz

12 mamyr kúni bastalǵan III Elorda Cup týrnıri 18 mamyrda máresine jetti. Jarys qo­rytyndysy boıynsha 24 sal­maqta je­ńim­pazdar anyqtalyp, segiz boksshy byl­tyrǵy chempıondyq ataǵyn qorǵap qaldy.

Týrızm jáne sport mınıstrliginiń baspasóz qyzmeti habarlaǵandaı, jarysqa alys-jaqyn elderden kelgenderdiń arasynda 10 álem chempıony, 20-ǵa jýyq Pa­rıj Olımpıadasy joldamasynyń ıeger­leri júldege talasty. Alty kúnge jalǵas­qan básekede 14 boksshymyz altyn medal jeńip, el boksshylary (erler jáne qyzdar) komandalyq esepte top jardy.

– Halyqaralyq jarysqa jerlesterimiz birneshe qurammen qatysty. Parıj Olımpıadasynda el namysyn qorǵaıtyn boksshylarymyz tórtjyldyqtyń mańyz­dy dodasy aldyndaǵy sońǵy daıyndyq jekpe-jekterin  ótkizse, jas boksshylarǵa úlken tájirıbe alańy, bapkerlik quramǵa ózderin dáleldeý úshin zor múmkindik boldy. Halyqaralyq saıysta top jarǵan byl­ǵary qolǵap sheberlerin jarqyn jeńisimen quttyqtaımyn, – dedi Týrızm jáne sport mınıstri Ermek Marjyqpaev.

Dúbirli dodada 155 jekpe-jek ótkizilip, 13 aıqas tehnıkalyq nokaýtpen aıaqtaldy. Tórt kezdesýde nokaýt tirkeldi. Sondaı keremet nokaýttyń birin 75 kılodaǵy Tımýr Nurseıitov jasady. Jerlesimiz ózbek boks­shysy Sardor Shomýrodovty sulatyp, jarysty erte aıaqtady. Al jartylaı fınalda byltyrǵy álem chempıonatynyń qola júldegeri Alohon Abdýllaevtan basym tústi.

– Bul dodanyń tanymaldylyǵy ýaqyt ótken saıyn artyp jatyr. Osy joly da qarsylastarym óte myqty. Birinshi jekpe-jegimde О́zbekstan sportshysyn nokaýtqa jibergenim áleýmettik jelide keń tarady. Jartylaı fınalda byltyrǵy álem chempıonatynyń qola júldegeri Alohon Abdýllaevtan aılamdy asyrdym. Buǵan deıin naýryz aıynda Ázer­baıjandaǵy «Jibek joly» jarysynda alǵashqy aınalymda ózbek boksshysyna jol berip edim. Mine, endi sol ketken ese­ni qaıtardym. Fınaldaǵy qarsylasym Ar­mat Armanulymen Aqtaýdaǵy týrnırde ese jibergenmin. Osy joly revansh boldy, – dedi T.Nurseıitov.

Atalǵan týrnırde 11 jekpe-jekte qar­sylas rıngke shyqpady. Nátıjesinde, Sáken Bıbosynov, Karım Serkebaev, Mahmud Sabyrhan, Qamshybek Qońqabaev fınalda judyryqtaspaı-aq chempıon atandy.

– Bizdiń basty maqsatymyz – Olım­pıa­da. Sondyqtan quramadaǵy boksshylarymyz jaraqat alyp qalmaý úshin fı­nalda óner kórsetpedi. Tek Nurbek Oral­­baı ǵana fınalda synǵa tústi, jeńiske jetti. Jigit­terge kóńilim tolady. Aldaǵy ýaqytta qu­­­rama jattyǵýynda kemshiliktermen ju­­­­mys is­tep, Olımpıadaǵa daıyn bolyp ba­­ra­myz, – de­di bokstan Qazaqstannyń qu­ra­­ma­synyń bas bapkeri Myrzaǵalı Aıt­janov.

Bir qyzyǵy, Olımpıada joldamasy­nyń ıegerleri Nurbek Oralbaı, Aıbek Oral­baı jańa salmaqta óner kórsetti. Nurbek 86 kg sal­maqta chempıon atansa, Aı­bek asa aýyr sal­maqta kúmis júldeni qana­ǵat tutty.

Byltyr О́zbekstan chempıonatyn óz kózimizben kórgen edik. Sonda 71 kg sal­maqtyń jartylaı fınalynda qan­dasymyz Aman Qonysbekov álem chempıony Asadhoja Mýıdinhojaevty qýyp júrip sabasa da, tipti, nokdaýnǵa jiberse de tóreshiler jeńisti Asadhojaǵa bergen edi. Sol jarystan keıin Aman bizge tóreshilerdiń sheshimine rıza emes ekenin aıtyp edi. Endi, mine, Amandy Elorda Cup týrnırinde qaıta jolyqtyrdyq. Ol atajurtyna birjola kelipti. Búginde Myrzaǵalı Aıtjanovtyń shákirti. Aman týrnırde úzdik úshtikten kórindi.

Erler:

Qazaqstan – 9 altyn, 8 kúmis, 14 qola

О́zbekstan – 1 altyn, 2 kúmis, 2 qola

Qytaı – 1 altyn, 1 kúmis

Áıelder:

Qazaqstan – 5 altyn, 5 kúmis, 11 qola

Qytaı – 4 altyn, 1 qola

Úndistan – 2 altyn, 2 kúmis, 4 qola

Chempıon atanǵan jerlesterimiz

Erler:

51 kg. Sáken Bıbosynov

54 kg. Karım Serkebaev

57 kg. Mahmud Sabyrhan

60 kg. Talǵat Syrymbetov

67 kg. Nurbek Mýrsal

75 kg. Tımýr Nurseıitov

86 kg. Nurbek Oralbaı

92 kg. Saǵyndyq Toǵambaı

+92 kg. Qamshybek Qońqabaev

Áıelder:

57 kg. Karına Ibragımova

60 kg. Vıktorııa Grafeeva

63 kg. Aıda Ábikeeva

70 kg. Madına Nurysheva

+81 kg. Eldana Talıpova

Eń úzdik boksshylar:

+92 kg. Qamshybek Qońqabaev

54 kg. Iýan Chang