NU Medısına mektebiniń túlekteri endi álemniń qaı jerinde bolsyn jumys isteı alady. Sebebi Eýrazııalyq joǵary bilim berý jáne densaýlyq saqtaý sapasyn akkredıtteý jáne kepildendirý ortalyǵynan «Medısına ǵylymdarynyń doktory» baǵdarlamasy boıynsha tolyq halyqaralyq akkredıtasııa aldy.
Eýrazııalyq joǵary bilim berý jáne densaýlyq saqtaý sapasyn akkredıtteý jáne kepildendirý ortalyǵy (ECAQA) Eýropalyq joǵary bilim sapasyna kepildik berý qaýymdastyǵynyń quramyna kiredi. Ony Dúnıejúzilik medısınalyq bilim berý federasııasy da moıyndaıdy. Besjyldyq akkredıtteý NU-dyń «Medısına ǵylymdarynyń doktory» baǵdarlamasy sapa men ozyq medısınalyq bilim berýdiń qatań standarttaryna sáıkes keletinin rastaıdy. Bul rette oqý baǵdarlamasy, oqytýshylardyń biliktiligi, zertteý múmkindikteri, stýdentterdi qoldaý qyzmeti jáne klınıkalyq baza jan-jaqty baǵalanbaq.
– Medısına ǵylymdarynyń doktory» baǵdarlamasynyń ECAQA-nyń tolyq akkredıtasııasyn alýy – NU Medısına mektebiniń mańyzdy qadamy. Bul bizdiń oqytýshylarymyzdyń, qyzmetkerlerimizdiń jáne stýdentterimizdiń eńbegi men talpynysynyń kýási, sondaı-aq joǵary deńgeıdegi medısınalyq bilim berý boıynsha mıssııamyzdy rastaıdy. Bolashaq medısına mamandaryn sapaly daıarlaýǵa degen umtylysymyzdyń dáleli. Olar bizdiń qoǵamymyzdyń jáne odan tys jerlerdiń densaýlyq saqtaý salasyndaǵy túrli máseleni sheship, kún saıyn artyp kele jatqan mindetterdi oryndaı alýy kerek, – degen edi NU vıse-prezıdenti jáne Medısına mektebiniń dekany Massımo Pınıatellı.
ECAQA-nyń tolyq akkredıtasııasy stýdentterge kóp múmkindik beredi. Sebebi ol – kepildendirilgen bilim sapasy. Eki jyl ishinde ECAQA sarapshylary baǵdarlamany muqııat taldady. Ol halyqaralyq úzdik tájirıbelerge (best practices) sáıkes keldi ári stýdentterdiń sapaly bilim, ozyq klınıkalyq bazalar men tehnologııalarǵa qoljetimdiligin qamtamasyz etedi degen qorytyndyǵa keldi. Sonymen qatar NU Medısına mektebiniń túlekterine bedeldi medısınalyq mekemelerge jumysqa ornalasýǵa jáne oqýyn ári qaraı jalǵastyrýǵa múmkindik ashylmaq.
Tórt jyldyq «Medısına ǵylymdarynyń doktory» baǵdarlamasy AQSh-tyń bilim berý modeline negizdelgen. Baǵdarlamaǵa túsý úshin negizgi medısına nemese basqa da tıisti bilim boıynsha dıplom qajet. Oqytý úderisi naýqasty emdeý arqyly júrgiziledi. Alǵashqy eki jylda stýdentter UMC aýrýhanalarynda apta saıynǵy sessııadan jáne sońǵy jyldary klınıkalyq tájirıbeden ótedi. Odan keıin medısına ǵylymynyń doktory dárejesimen rezıdentýra men doktorantýrada oqýdy jalǵastyrýǵa bolady. Mektepte bakalavrıattan rezıdentýraǵa deıin barlyǵy 22 bilim berý baǵdarlamasy bar. Atalǵan baǵdarlamalar boıynsha osy ýaqytqa deıin 500-ge jýyq adam bilim alǵan.
Halyqaralyq akkredıtteý ýnıversıtetti álemdik arenada bedeldi ete túsedi. Talapkerlerdiń, onyń ishinde sheteldikterdiń qyzyǵýshylyǵyn arttyrady. Tartymdylyqtyń artqanyn bildiredi. Akkredıtteý úderisi munymen toqtap qalmaıdy. NU Medısına mektebi Qazaqstanda medısınalyq sala kóshbasshylary qaýymdastyǵyn qalyptastyrý maqsatynda óziniń baǵdarlamalary men zertteýlerin jetildirýdi jalǵastyrýǵa mindetteme alyp otyr. 2015 jyly qurylǵannan beri NU Medısına mektebi ınnovasııalyq densaýlyq saqtaý júıesin qura aldy, onyń ishinde ǵylymı zerthanalar men Ýnıversıtet medısına ortalyǵy (UMC) bar. Tipti medısınalyq klınıkalar úshin «altyn standart» sanalatyn Halyqaralyq birikken komıssııanyń (JCI) akkredıtasııasy bar. Stýdentter UMC-tyń akademııalyq klınıkalyq kafedralarynda tájirıbe jınap, oqýdy bitirgennen keıin rezıdentýradan ótedi. Osylaısha, akademııalyq medısınalyq ortalyq Pıttsbýrg ýnıversıtetiniń Medısına mektebi retindegi seriktesiniń qoldaýymen halyqaralyq medısınalyq habqa aınala alady.