Qaladan 30 km jerde ýaqytsha salynǵan aınalma joldy Baıshaqa ózeginen keletin sý shaıyp ketti. Kelgen sýdy teńizge qaraı kedergisiz ótkizip jiberý úshin bul jer taǵy 2 metrge qazylyp, dıametri 100 sm bolatyn 6 qubyr salyndy. Jumystar bir táýlikke jalǵasyp, dereý kólik qozǵalysy úshin jol ashyldy, dep habarlaıdy Egemen.kz Atyraý oblysy boıynsha TJ jónindegi jedel shtabtyń málimetine silteme jasap.
- Ýaqytsha jumystar kezinde kólikter áli paıdalanýǵa berilmegen kópir arqyly qatynady. Tasjolǵa ór sýy kelgen boıda kedergisiz Kaspıı teńizine qaraı ótkizip jiberý úshin dereý materıal aldyryp, jumystardy bastap kettik. Bul arqyly «Atyraý-Astrahan» tasjolyn nópir sý basý qaýpin seıiltemiz, - dedi Atyraý oblysy «QazAvtoJol» UK AQ basshysynyń orynbasary Azamat Qabdyǵalıev.
Sý ótkizgish turba salý jumystaryna 20 birlik tehnıka men 30 adam jumyldyryldy.