Dúnıejúzilik ekonomıkalyq forýmnyń Saıahat pen týrızmdi damytý ındeksine sáıkes týrıstik baǵyttar tiziminde nátıjemiz ájeptáýir jaqsarypty. Jalpy 119 el arasynan Qazaqstan 52-orynǵa turaqtady.
Osyǵan deıin ındekste elimiz 117 memlekettiń arasynda 66-orynda bolǵanyn aıta ketkenimiz jón. Baǵalaý nátıjesine keńinen toqtalsaq, eldiń týrızmi básekege qabilettilik jaǵynan 2-satyǵa jaıǵasypty. Týrızmniń áleýmettik-ekonomıkalyq áseri jaǵynan bestikte bolsa, densaýlyq saqtaý jáne gıgıena boıynsha 23-orynda. Buǵan qosa tabıǵı jáne mádenı resýrstar, adamı kapıtal men eńbek naryǵy, týrıstik ınfraqurylym men servıs sanattary boıynsha joǵary baǵa alǵan. Tizim boıynsha elimiz Ázerbaıjan, О́zbekstan, Qyrǵyzstannan alǵa shyǵyp, Ortalyq Azııadaǵy eń joǵary kórsetkishke ıe bolyp otyr.
Byltyr eldegi 19 kýrortty aımaqta 3,8 mıllıonnan asa týrıst demalǵan. Bul kórsetkish aldyńǵy jylmen salystyrǵanda 311 myń adamǵa ósken. Nátıjesinde, kýrortty aımaqtardaǵy qonaqúıler byltyr 130 mlrd teńgeden asa tabys tapqan. Týrıster arasynda Almaty taý klasteri eń tanymal oryndardyń biri sanalady. Byltyr bul kýrortty aımaqqa 2,3 mıllıonnan asa adam saıahattaǵan. Sol sekildi byltyr Mańǵystaý kýrortty aımaǵyna 356,2 myńnan asa adam barsa, Shýche-Býrabaıda 305,4 myń, Abaı oblysynyń Alakól kól jaǵalaýynda 205,8 myń qonaq demalǵan.
Týrızm jáne sport mınıstrligi Týrızm ındýstrııasy komıtetiniń tóraǵasy Nurtas Káripbaevtyń aıtýynsha, týrısterdi qabyldaý sharttaryn jetildirýge kóńil bólingen. Bul da bolsa, elge týrısterdiń kóptep kelýine septesse kerek.
«Jyl saıyn eldegi kýrortty aımaqtarda demalatyn týrıster sany artyp keledi. Bul atalǵan aımaqtardyń tartymdylyǵyn jáne elimizdiń týrıstik áleýetine qyzyǵýshylyq artqanyn ańǵartady. Bizdiń maqsatymyz – árbir qonaq elimizdiń ystyq yqylasy men qonaqjaılyǵyn sezinýi úshin týrısterdi qabyldaý sharttaryn odan ári jetildirý», deıdi N.Káripbaev.