Burynǵy Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın birneshe kúnnen beri Qazaqstannan tys jerde júr, dep habarlaıdy Egemen.kz.
«Men AQSh-ta júrgenime birneshe kún boldy. Belgili bir maqsattar bar. Árıne, men ýáde etilgendeı, kásibı máselelerdi otbasylyq máselelermen biriktirýge tyrysamyn. Bul joly súıiktim Dına, kenje qyzym Birǵanym úsheýmiz shaǵyn top bolyp ushýdy jón kórdik», dep jazdy Baǵdat Mýsın áleýmettik jelidegi paraqshasynda.
Ol osy kúnderi Bay Area-da ótetin birneshe is-sharalarǵa qatysýdy josparlap otyrǵanyn aıtty.
«Dástúr boıynsha Digital Nomads-pen (bizdiń aımaqtyń Bay area - da ornalasqan IT mamandarymen) kezdesip, túrli áleýmettik bastamalardy talqylaımyz. Kezdesý biz qurǵan Silkroad ınnovasııalyq habynyń qabyrǵasynda ótedi. Elimizdiń Sporttyq baǵdarlamalaý federasııasynyń basshysy bolǵandyqtan, osy jyldyń qyrkúıeginde Astanada zııatkerlik sportymyzdan (sporttyq baǵdarlamalaý) Álem chempıonatynyń fınalyn ótkizýge qatysty birneshe uıymdastyrýshylyq máselelerdi sheshýge baramyn. Ol úshin men ICPC basshysy Bıll Poýchermen jáne onyń komandasymen kezdesemin», dep túsindirdi eks-mınıstr.
Baǵdat Mýsın sondaı-aq basqa elderde sıfrlandyrýdyń negizin qalyptastyrý máselesin talqylaý úshin túrli ýnıversıtetterdiń professorlarymen birneshe kezdesýler ótkizýdi josparlap otyr.
«Qazaqstannyń tájirıbesin odan ári taratý qajet. AQSh ýnıversıtetteri buǵan qyzyǵýshylyq tanytady dep oılaımyn. Sondaı-aq túrli qorlarmen, kompanııalarmen kezdesýler ótedi. Jalpy bul saparǵa jospar kóp. Barlyǵyn oryndaýǵa múmkindiginshe tyrysamyn», dep túıindedi ol.
Eske salaıyq, Baǵdat Mýsın 2020 jyldyń 2 qyrkúıegi men 2024 jyldyń 30 sáýiri aralyǵynda Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstri qyzmetin atqarǵan edi.