Senattyń Halyqaralyq qatynastar, qorǵanys jáne qaýipsizdik komıtetiniń depýtattary elimizdiń aqparattyq-ımıdjdik saıasatyn iske asyrý máselesi boıynsha memlekettik organdar jáne uıymdar ókilderimen kezdesti, dep habarlaıdy Egemen.kz Senattyń baspasóz qyzmetine silteme jasap.
Komıtet tóraǵasy Andreı Lýkın óz sózinde jahandyq jáne óńirlik ahýal kúrt ózgerip jatqan kezde elimizge naqty nátıjesi bolýy úshin Qazaqstannyń halyqaralyq bastamalaryn neǵurlym tıimdi jáne júıeli ilgeriletý mańyzdy ekenin atap ótti.
«Elimizdiń bet-beınesin qalyptastyrý ońaı is emes, óıtkeni bul básekelestik jaǵdaıynda júredi jáne qyzmettiń barlyq salalarynda júıeli, logıkalyq jáne maqsatty jumysty talap etedi. Ulttyq brend, mádenı mura, bilim, ǵylym jáne tehnologııa, ekonomıkalyq turaqtylyq, elimizdiń álemdik qoǵamdastyqqa bedeli men yqpaly, shet eldermen ıntegrasııa - osynyń bári elimizdiń kúshti jáne keleshegi zor áriptes retinde tanylýyna áser etedi. Bul máselelerge nazar aýdarmaý álemdik arenada aıtarlyqtaı shyǵynǵa ákelýi múmkin», dedi senator Lýkın.
Kezdesý barysynda elimizdiń saıası kelbeti men syrtqy ınvestısııaǵa, bıýdjetti únemdeý jáne iri sharalardy qaıta qaraýǵa qatysty máseleler talqylandy. «Qorǵas – Shyǵys qaqpasy» ekonomıkalyq aımaǵynda ónerkásipti qala salý jáne Qazaqstannyń halyqaralyq qurylymǵa tıimdi qatysýy sııaqty balama jobalardy ázirleý máselesine erekshe nazar aýdaryldy. Sondaı-aq syrtqy ister mınıstriniń orynbasary Roman Vasılenko men Mádenıet jáne aqparat mınıstriniń orynbasary Qanat Ysqaqov baıandama jasady.