Qazaqstanda otandyq ǵylymǵa bólinetin qarjy udaıy artyp keledi. Al bilikti kadrlar ázirleýge arnalǵan grant sany sońǵy jyldary bir jarym ese kóbeıdi. Bul týraly Memleket basshysy Qasym-Jomart Toqaev ǵalymdarmen kezdesýinde aıtty, dep jazady Egemen.kz Aqorda baspasóz qyzmetine silteme jasap.
Prezıdenttiń aıtýynsha, qazir elimizde álemniń bedeldi 12 joǵary oqý ornynyń fılıaly jumys istep tur. Odan bólek, jyl saıyn 500 ǵalym shetelde taǵylymdamadan ótedi.
«О́zderińizge málim, ǵylymǵa bólinetin qarjy udaıy artyp keledi. Bilikti kadrlar ázirleýge arnalǵan grant sany sońǵy jyldary bir jarym ese kóbeıdi. Qazaqstanda álemniń bedeldi 12 joǵary oqý ornynyń fılıaly jumys istep tur. Kóp uzamaı taǵy birnesheýi ashylady. Zertteý jumystarymen aınalysatyn ýnıversıtetter kóbeıýde. Tehnologııa parkteri jáne ınjınırıng ortalyqtary ashylyp jatyr. Jyl saıyn 500 ǵalym shetelde taǵylymdamadan ótedi. Mınıstrlik jas ǵalymdarǵa myńdaǵan grant bólip jatyr. Munyń bári ǵylymdy damytýǵa oń yqpalyn tıgizedi dep oılaımyn», dedi Qasym-Jomart Kemeluly.
Memleket basshysynyń paıymynsha, otandyq ǵalymdar sheteldik ǵalymdarmen yntymaqtastyq ornatyp, tyǵyz baılanysta bolý kerek. Sebebi, bul - tájirıbe almasýdyń tıimdi joly.
«Men shetelge saparlarym kezinde ǵalymdarmen jıi kezdesemin. Olardy qazaq ǵalymdarymen tyǵyz baılanys ornatýǵa shaqyramyn. О́tken aptada sıngapýrlyq ǵalymdarmen jáne ondaǵy joǵary oqý oryndarynyń rektorlarymen arnaıy júzdestim. Endi Sıngapýrda ǵylymı kadrlarymyzdy oqytatyn boldyq. Jalpy, Sıngapýr sııaqty ekonomıkasy ozyq elderden kóp nárse úırenýge bolady. Postındýstrıaldy dáýirde álemge ashyq bolý jáne ınnovasııaǵa umtylý kez kelgen eldiń tabysqa jetýi úshin asa mańyzdy faktor sanalady. Sondyqtan úzdik halyqaralyq tájirıbeni muqııat zertteımiz jáne odan úlgi alamyz. Ozyq tehnologııalar men ıdeıalardy engizemiz», dedi el Prezıdenti.