2022 jylǵy 16 maýsymda Ulytaýdyń eteginde, Joshyhan kesheninde tuńǵysh Ulttyq Quryltaı bolyp ótti. Sol quryltaıda el Prezıdenti kóptegen qundy bastamalar kóterdi, Qasym-Jomart Toqaev Áýlıetaýdyń eteginde Memlekettik rámizder alańyn ashýdy tapsyrdy, dep jazady Egemen.kz.
Prezıdent Ulytaýdaǵy sol Quryltaıda «Ulttyq Quryltaıdyń Ulytaýda bastalǵany durys boldy. Kıeli ólkemiz Jańa Qazaqstandy qurý jolyndaǵy birliktiń sımvolyna aınaldy. Osy oraıda, men taǵy bir mańyzdy bastama kótergim keledi. Bul jerde barlyq rýlardyń tańbasy tasqa jazylǵan. Sol arqyly babalarymyz ult birligin kórsetken. Qanysh Sátbaev «Elimizdiń tý tikken jeri – Tańbaly tas» degen. О́kinishke qaraı, qasterli jazýlar keıin ábden búlindi. El azamattary Ulytaýǵa eskertkish qoıyp, tastaǵy tańbalardy jańǵyrtty. Biraq, bul jetkiliksiz dep oılaımyn. Munda qazaqtyń birligin áıgileıtin sáýletti nysan turýy kerek. Men Áýlıetaýdyń eteginde Memlekettik rámizder alańyn ashýdy tapsyramyn. Qasıetti óńirde Kók Baıraǵymyz asqaqtap turýǵa tıis. Sol arqyly urpaqtar sabaqtastyǵy jalǵasyp jatqanyn kórsetemiz. Tamyry tereń memlekettigimizdiń jańa dáýiri bastalǵanyn bildiremiz», degen bolatyn. Bul bastama estigen eldi tebirentip jiberdi, kóńilder qýanyshqa keneldi. Mine, sodan beri eki jyl ýaqyt ótti.
2023 jyly Konstıtýsııa kúnine arnalǵan saltanatty jınalysta oblys ákimi Berik Ábdiǵalıuly Memlekettik rámizder alańy týraly arnaıy toqtalyp, «eskızder jasalyp, bekitilgenin, konkýrstyq jumystardyń uıymdastyrylǵanyn, qurylystyń bastalatynyn jáne «Qudaı qalasa, kelesi jylǵy Rámizder kúninde ashý josparda bar» degen edi. Buǵan da jylǵa jýyqtady. Memlekettik Rámizder kúni qarsańynda «Osy nysan ashylyp qala ma?» dep qyzyǵýshylyq tanytqanda bilgenimiz, «qurylys endi -endi ǵana qyza bastaǵanǵa» uqsaıdy. Sebep?
Ulytaý oblysynyń qurylys, sáýlet jáne qala qurylysy basqarmasynyń basshysy Tımýr Álıhanuly Bıjanov munyń naqty sebebin ashyp aıtpasa da, sóziniń aýanynan aýa raıy qolbaılaý boldy degisi keletinin ańǵaryp qaldyq. Múmkin...
Biraq, tapsyrma berilgeli eki jyl ótti ǵoı. Bir alań qurylysyn tap-tuınaqtaı etip bitirip tastaý úshin bul az ýaqyt bolmasa kerek. Osynyń ózi de kóp nárseni ańǵartady. Tereńdep keregi de joq-aý... Bári aıtpasa da túsinikti emes pe? Kim kináli, nege bulaı? Mundaı suraqtarǵa myń san jaýap tabýǵa da bolady. Biraq, bir nárse anyq, el basshysynyń eń alǵashqy Ulytaýdaǵy Ulttyq Quryltaıda bergen tapsyrmasyn oryndaýda ulytaýlyqtarǵa ilkimdilik jetispeı jatyr. Áıtpese, aldaǵy Rámizder kúninde Memlekettik Rámizder alańy saltanatty jaǵdaıda ashylyp jatar bolsa, sáni de, máni de qabysqan sharýa bolmas pa edi?..