Qazylar qııanat jasady

Jarys jolynda qalǵan úsh boksshynyń jolyna qazirgi kezde úlken úmitpen qarap otyrǵan jaıymyz bar. 50 kg salmaq dáre­jesindegi Nazym Qyzaıbaı tusaýkeser kezde­sýinde jastar arasyndaǵy Eýropa birin­shiliginiń (U-22) eki márte qola júldegeri, slova­kııalyq Nıkol Dýrıkovany aıqyn basym­dyqpen jeńse, keshe 1/16 fınalda oń­tús­tikkoreıalyq Djýhıýng Djýnmen sheber­lik baı­qasty. Bul jekpe-jekte de barlyq tóre­shi tarapynan Nazymnyń myqtylyǵy bir­­aýyz­dan moıyndaldy.

Úsh birdeı qarsylasy – fılıppındik Krıstıan Laýrente, túrkııalyq Mızan Aıkól jáne ıtalııalyq Djanlýıdjı Ma­langany esh kúmánsiz utqan 63,5 kg sal­maqtaǵy Muha­medsabyr Bazarbaıuly shırek fınalda Erıslandı Alvarespen aıqasty. Kýbanyń qabylany byltyr Tash­kent­te ótken álem chempıonatynyń aqtyq syny­na alqynbaı jetti. Sheshýshi tusta fran­sııalyq Sofııa Ýmııadan utylyp, kúmis medaldy ıelendi. Ol – basqa da asa iri halyq­aralyq ja­rystarda jeńis tuǵyryna kóterilgen ákki boksshy.

Bazarbaıuly men Alvares arasynda­ǵy jekpe-jek óte tartysty ótti. Básekeniń basynan aıaǵyna deıin ekeýi de qarqynyn bir báseńdetken joq. Bir qaraǵanda, bizdiń jigit basym bolǵandaı kórindi. Kóbine-kóp shabýyldaǵan – Muhamedsabyr. Báseke barysynda ol kýbalyqty nokdaýnǵa da jiberdi, qabaǵyn da jardy. Biraq tóreshilerdiń búıregi Alvareske burǵany anyq baıqal­dy. Rıngtegi qazy qazaq boksshysyna qaıta-qaıta eskertý jasap, ony ábden tyǵyryqqa tiredi. Qaptaldaǵy tóreshiler de qalyspady. Olar da Bostandyq araly ókiline kóp upaı berip, qandasymyzdyń eńbegin elemedi. Nátıje­sinde, Erıslandı Alvares jartylaı fınalǵa ­ótti. Al Muhamedsabyr Bazarbaıuly endi qo­sym­sha joldama úshin talasady.

Esterińizge sala keteıik, buǵan deıin 60 kg salmaqta kúsh synasqan Rımma Volosen­ko tusaý­keser kezdesýinde germanııalyq Fe­lısıtas Marııa Ganglbaýerden basym túske­ni­men, ekinshi aınalymda Rımma úndistandyq Ankýshıta Borodan aılasyn asyra almady. 54 kg salmaqtaǵy Uljan Sársenbek Shera Meı Patrısıomen judyryqtasty. Uljan­nyń ulttyq qurama komandasynyń jeıdesin kıgeni keshe ǵana. Tájirıbeniń azdyǵy syn saǵatta syr berdi. Ol óz qarsylasynan upaı sanymen utyldy. 66 kg salmaqtaǵy Natalıa Bogdanova serbııalyq Krıstına Kýlýhova­nyń osal tusyn taba almady. Al 75 kg salmaq dárejesinde saıysqa túsken álem chempıony Valentına Halzova Eýropa chempıony, ýkraınalyq Karolına Mahnony utty.

Taǵy bir aıta keterlik jaıt, Bangkokta Qazaqstannyń jankúıerlerine esimderi etene tanys taǵy eki bylǵary qolǵap sheberi baq synap jatyr. Birinshisi – Azat Mahmetov (51 kg). Atbasar boks mektebiniń túlegi kezinde jastar arasyndaǵy Qazaqstan birinshili­gin­de dara shyǵyp, el chempıonatynyń kúmis júldegeri jáne Islam yntymaqtastyǵy oıyndary­nyń jeńimpazy atandy. Keıin­nen Bahreınge qo­nys aýdaryp, keıingi jylda­ry sol eldiń namy­syn qorǵap júr. Ekinshisi – Vladıslava Kýhta ­(57 kg). Qostanaıdyń ­týmasy Qazaqstan chem­pıonatyn úsh ret utyp, birqatar halyqara­lyq týrnırde top jardy. Byltyr ol Majar­stan azamattyǵyn aldy. О́kinishke qaraı, Azat alǵashqy aınalym­nan asa almady. Al Vladıslava ázirge sátti óner kórsetip jatyr.

Sondaı-aq Qytaı men Mońǵolııanyń týy astynda kúsh synasyp júrgen qazaq boksshylary Danabek Baıǵazy men Beknur Halıge de jankúıer bolamyz. Asa aýyr salmaqta judyryqtasyp júrgen qos qandasymyz bas­tapqy básekelerinde jeńiske jetti.