Bul kúnderi Parıjde «Rolan Garros» týrnıri dúrildep tur. Júlde qory 53 478 000 eýrony quraǵan dúbirli dodada tórtkúl dúnıeniń teńdessiz tennısshileriniń barlyǵy baq synap jatyr. Solardyń qatarynda Qazaqstannyń da oıynshylary bar.
Fransııa astanasyndaǵy jarys jerlesterimiz úshin kóńilsizdeý bastaldy. Irikteý týrnırinen irkilmeı ótip, myqtylarmen kúsh synasý qurmetine ıe bolǵan Mıhaıl Kýkýshkın (álemniń 135-raketkasy) tusaýkeser kezdesýinde majarstandyq Fabıan Marojanǵa (№43) ese jiberdi – 2:6, 2:6, 3:6. Esesine odan keıin kortqa shyqqan otandastarymyzdyń barlyǵy da bastapqy básekelerinde basymdyq tanytty. Atap aıtsaq, Aleksandr Shevchenko (№58) reseılik Aslan Karasevpen (№82) kúsh synasty. Osydan úsh jyl buryn Soltústik Osetııanyń týmasy Melbýrndegi dodanyń jartylaı fınalyna deıin jetken edi. Keıingi kezde Karsev qarqynyn biraz báseńdetip aldy. Uzaq ýaqyt boıy tarazy basy teńselip turǵan tartys Shevchenkonyń paıdasyna sheshildi – 6:4, 4:6, 1:6, 6:1, 6:4. Al Aleksandr Býblık (№17) fransııalyq Gregýar Barrerden aılasyn asyrdy – 6:4, 7:5, 6:3.
Qazaqstannyń úzdigi Elena Rybakına (№4) Gret Mınnenmen sheberlik baıqasty. Álemdik reıtıngte 86-orynda turǵan belgııalyq burymdynyń baǵyndyrǵan pálendeı belesteri joq. Sol sebepti de Rybakınaǵa qarsylasyn qapy qaldyrý esh qıyndyq týǵyzbady – 6:2, 6:3. Elimizdiń ekinshi raketkasy Iýlııa Pýtınseva (№39) Sloan Stıvenspen saıysqa tústi. Qazirgi kezde WTA reıtınginde 45-satyǵa jaıǵasqan 31 jastaǵy AQSh tennısshisi kezinde úzdikter tiziminde úshinshi orynǵa deıin kóterilgen. Ol 2017 jyl US open týrnırinde top jaryp, 2018 jyly Rolan Garrostyń aqtyq synynda oınady. Aýstralııanyń ashyq birinshiliginiń jartylaı fınalyna deıin jetti. Biraq osy joly Stıvenstiń juldyzdy sátteri artta qalǵanyna anyq kóz jetkizdik. Amerıkalyq tennısshi Pýtınsevaǵa jarytyp qarsylyq kórsete almady – 1:6, 2:6.
Ekinshi kezeńde Elena Rybakına nıderlandtyq Aranta Rýspen sheberlik baıqasty. Qyzǵaldaqtar elinen kelgen 33 jastaǵy sportshynyń eń úzdik kórsetkishi – osydan 12 jyl buryn «Rolan Garrostyń» tórtinshi kezeńinde óner kórsetken. Qazirgi kezde ol úzdikter tiziminde 56-satyǵa jaıǵasty. Parıjdegi týrnırge Arantanyń jaqsy daıarlyqpen kelgeni birden baıqaldy. Tusaýkeser kezdesýinde Nıderlandtyń oıynshysy Germanııanyń ataqty tennısshisi, álemniń burynǵy birinshi raketkasy Anjelıka Kerberdiń ózin qapy qaldyrdy. Biraq Rybakına odan myqty ekenin taıǵa tańba basqandaı etip dáleldedi – 6:3, 6:4.
Iýlııa Pýtınseva ıspanııalyq Paýla Badosamen kezdesti. Pıreneı túbeginiń ókili osydan úsh jyl buryn dál osy týrnırdiń shırek fınalynda oınady. 2021 jyly «Ýımbldon» men 2022 jyly Aýstralııanyń ashyq birinshiliginiń tórtinshi aınalymyna deıin jetti. Sol tabystary arqyly álemniń ekinshi raketkasy atandy. Keıingi ýaqytta qarqynyn qatty báseńdetip alǵan Badosa WTA reıtınginde 124-oryndy qanaǵat tutyp tur. Desek te Pýtınsevaǵa qarsy kezdesýde óte saýatty ári jınaqy oınaǵan Ispanııanyń ókili 4:6, 6:1, 7:5 esebimen jeńiske jetti.
Aleksandr Shevchenko fransııalyq Korenten Mýtemen kúsh synasty. Kort qojaıyny ATR reıtınginde 75-orynda tur. Bul básekede Mýtý basym tústi – 4:6, 2:6, 6:0, 3:6. Aleksandr Býblık germanııalyq Iаn-Lennard Shtrýffpen aıqasty. 25 jastaǵy nemis oıynshysy 2019 jáne 2021 jyldary «Rolan Garrostyń» tórtinshi aınalymynda súringen. Bul kúnderi ol – WTA tiziminde 39-orynda. Bul oıynda Shtrýfftyń mysy basym boldy – 2:6, 2:6, 3:6. Sóıtip, jarys jolynda Qazaqstannyń bir ǵana tennısshisi qaldy. Ol – Elena Rybakına. Endi otandasymyz belgııalyq Elıne Mertenspen kezdesedi.
Osydan bir apta buryn «Rolan Garrosta» kimniń baǵy janady?» degen maqalasynda osy týrnırdiń rekordshysy Rafael Nadal jaıynda biraz áńgimeledik. Statıstıkalyq derekterge súıensek, 2005-2022 jyldar aralyǵynda ol Parıjdegi jarysqa 18 márte qatysyp, 13 ret bas júldeni oljalady. Barlyǵy 116 márte kortqa shyǵyp, 112 ret jeńis toıyn toılady. Bul – keremet kórsetkish. Osyndaı zor tabysynyń arqasynda Rafael «Grýnt koroli» degen ataqqa ıe boldy. Mine, sol Ispanııanyń dańqty tennısshisi bıylǵy «Rolan Garrostyń» alǵashqy aınalymynan asa almady. 37 jastaǵy Nadaldi 27 jastaǵy nemis oıynshysy Aleksandr Zverev toqtatty. Esep – 6:3, 7:6, 6:3.
Rafael Nadalmen túıdeı qurdas ulybrıtanııalyq Endı Marreı de birinshi kezdesýinde jeńilistiń kermek dámin tatty. Kezinde Ýımbldon men Olımpıadany eki jáne US Open dodasyn bir márte utyp, Aýstralııanyń ashyq birinshiliginiń fınalynda bes ret oınaǵan álemniń burynǵy birinshi raketkasy jasy 40-qa taıap qalǵan Sten Vavrınkaǵa jol berdi – 4:6, 4:6, 2:6. Desek te Shveısarııa tennısshisin de osal dep aıta almaımyz. Dáýiri júrip turǵan kezinde Vavrınka «Úlken dýlyǵa» sanatyna jatatyn Melbýrn, Parıj jáne Nıý-Iorktegi týrnırlerde top jarǵanyn jankúıerler jaqsy biledi.