Jarys kúndeligi

Shaıbaly hokkeıden álem chempıona­ty aıaqtalǵannan keıin reıtıng jańartyl­dy. Sóıtip, 2025 jyly Shvesııa men Danııada uıymdastyrylatyn dúnıejúzilik dodada qaı komandalardyń ózara kúsh synasatyny belgili boldy. Sonymen kelesi maýsymda A tobynda Kanada, Shvesııa, Shveısarııa, Slovakııa, Latvııa, Aýstrııa, Fransııa, Slovenııa quramalary óner kórsetse, V tobynda Fınlıandııa, Chehııa, AQSh, Germanııa, Danııa, Norvegııa, Qazaqstan, Majarstan baq synaıdy. 8 maýsymda Qytaıdyń Aqsý qalasyn­da aralas jekpe-jekten WKG týrnıri ­ótedi. Jarystyń basty básekesinde qytaı­lyq qandasymyz Taılaq Nurajyuly (9-1) reseılik Maksım Shım­chenkomen (8-3) kúsh synasady. Halyqaralyq shańǵy sporty federasııasy (FIS) 2024/2025 jylǵy maýsymda ótetin Álem kýboginiń kezeńdik saıys­tarynyń kúntizbesin jarııalady. Frıs­taıl-mogýl men frıstaıl-akrobatıkadan baıraqty básekelerdiń biri 21-23 aqpan aralyǵynda Almatyda uıymdastyrylady. 5-12 maýsym aralyǵynda Almatyda shossedegi velosporttan Azııa birinshiliginiń jalaýy jelbireıdi. Sary qurlyqtyń dúl­dúlderi bas qosatyn jarysta Qazaqstannyń týy astynda Nıkolıa Vınokýrov, Rýslan Álıev, Rýdolf Remhı, Andreı Remhe, Dmıtrıı Grýzdev, Evgenıı Fedorov, Gleb Brýsenskıı, Igor Chjan, Evgenıı Gıdıch, Dmıtrıı Grýzdev syndy sportshylar óner kórsetedi. 1 maýsymda Astanadaǵy Jaqsylyq Úshkempirov atyndaǵy jekpe-jek saraıynda sýrdo-fýtzaldan jastar ara­syndaǵy (U-21) álem birinshiliginiń shymyl­dyǵy túriledi. Bul básekede Qazaqstannan bólek, Brazılııa, Ýkraına, Oman, Iran, Ázerbaıjan, Tájikstan, Taıland, О́zbekstan jáne Saýd Arabııasy quramalary baq synaıdy. Jarys 10 maýsymda márege jetedi. Fýtboldan Qazaqstan kýboginiń jartylaı fınaldyq saıystary ótti. Qos­tanaıdyń «Tobyly» óz alańynda «Atyraýdyń» qaqpasyna jaýapsyz eki dop soqty – 2:0. Bul goldardyń avtorlary – Ahmed Ál-Messaýdı (40-mınýt, penaltıden) men Jasulan Jumashev (86-mınýt). «Aqtóbe» men «Elimaı» arasyndaǵy match ta dál sondaı eseppen aıaqtaldy – 2:0. Bul oıynda Dornı Romero (25-mınýt) men Maksım Samorodov (33-mınýt) nysanany dál kózdedi. Fılıppınniń astanasy Manılada voleıboldan «Shaqyrý kýbogi» aıaqtaldy. Qazaqstannyń áıelder quramasy aqtyq synǵa deıin alqynbaı jetkenimen, sheshý­shi tusta Vetnamǵa 0:3 (20:25, 22:25, 22:25) esebimen ese jiberip, kúmis medaldy qanaǵat tutty.