Boljamǵa beıqam qaraýǵa bolmaıtynyn kóktemde taǵy bir túsingendeı boldyq. Endi tosyn apattyń saldary egis alqaptarynyń ónimdiligine áser etedi, qala berdi jazda qurǵaqshylyq sharýalardy taǵy ábigerge salýy múmkin degen pikirler oqtyn-oqtyn aıtylyp qalady.
«Qazgıdromet» RMK mamandary kóktem jáne jaz aılaryndaǵy maýsymdyq aýa raıyna boljam jasaǵan edi. Osyǵan úńilsek, sáýir, mamyr aılarynda el aýmaǵynyń basym bóliginde aýanyń ortasha temperatýrasy bir aıdaǵy normadan 1 gradýs joǵary bolady dep kútilgen. Jaýyn-shashyn mólsheri eldiń basym bóliginde normadan kóp, soltústik-shyǵysta, ortalyqta jáne ońtústik oblystardyń soltústiginde norma shamasynda túsedi dep kútilgen. Sondaı-aq kóktemde «tosynsyı» kútiletinin, ıaǵnı aýa raıy qubylyp, ótpeli maýsymda sınoptıkalyq úderis óte turaqsyz boldy dep boljanǵan. Tipti Kaspııdiń ońtústigi jáne Reseıdiń Eýropalyq aýmaǵyndaǵy sıklondardyń áserinen túnde jańbyr men qar túrinde, kúndiz jańbyr túrinde, al ońtústik aımaqtarda sýyq aýa massalary enýiniń saldarynan úsik bolýy múmkin degen boljam jasalǵan. Kóktem de ótti. «Qazgıdromet» RMK mamandary ázirlegen maýsymdyq boljam dálme-dál, 100 paıyz keldi demesek te, shyndyqqa janasady.
Sonymen, jazda, dálirek aıtsaq, maýsymda aýanyń ortasha aılyq temperatýrasy respýblıkanyń basym bóliginde normadan 1-2 gradýs joǵary bolady degen boljam bar. Iаǵnı kóp óńirde kún raıy ádettegiden ystyq bolsa, eldiń batysynda temperatýra norma shamasynda bolady dep kútiledi. Al shilde, tamyz aılarynda aýanyń ortasha aılyq temperatýrasy norma shamasynda bolsa, tek tamyzda – eldiń ońtústigi men ońtústik-shyǵysynda normadan 1 gradýs joǵary bolýy múmkin.
Eger jazdyń basynda, maýsym aıynda jaýyn-shashyn mólsherden az kútilse, shilde jáne tamyz aılarynda eldiń basym bóliginde jaýyn-shashyn mólsheri norma shamasynda jáne normadan kóp túsýi bek múmkin. Tek shildede eldiń ońtústik-batysynda jáne ońtústik jartysynda, al tamyzda ortalyqta, ońtústikte jáne ońtústik-shyǵysta jaýyn-shashyn normadan az túsýi yqtımal. «Qazgıdromet» RMK uzaqmerzimdi aýa raıyn boljaý bóliminiń basshysy Juldyz Isabekovanyń aıtýynsha, bıyl jazdyń bas kezi 2006 jyldyń maýsym aıyndaǵy aýa raıyna uqsas bolady.
«Aldyn ala boljam boıynsha maýsymda elimizdiń ońtústik-shyǵys bóliginde aýa raıy normadan 1-2 gradýs joǵary bolady. Bul – qalypty jaǵdaı. Ortalyq, Soltústik jáne Shyǵys Qazaqstanda aýa temperatýrasy 22–25 gradýstan 30–38 gradýsqa deıin aýytqıdy. Ońtústikte jáne ońtústik-batysta 25–30-dan 35–39 gradýsqa deıin joǵarylaıdy. 40 gradýs dep aıta almaımyn, óıtkeni biz mamyr aıynda temperatýra 40-qa jetýi múmkin degen edik. Biraq temperatýra ońtústikte 33-34 gradýsqa deıin, soltústikte 28 gradýsqa deıin kóterildi. Sondyqtan jaz óte ystyq bolmaıdy», deıdi J.Isabekova.
Maýsymda el aýmaǵynda ylǵaldaný kópjyldyq mánder shamasynda kútilgenimen, birneshe óńirde atmosferalyq qurǵaqshylyq baıqalady eken. Mysaly, Qostanaı oblysynyń Amangeldi jáne Jangeldi aýdandarynda, Mańǵystaý oblysynyń Mańǵystaý jáne Qaraqııa aýdandarynda, Batys Qazaqstan oblysynyń Kaztalov aýdanynda jáne Qaraǵandy oblysynyń Shet aýdanynda atmosferalyq qurǵaqshylyq kútiledi. Sol sekildi maýsymda Shyǵys Qazaqstan oblysynyń Qatonqaraǵaı aýdanynda, Pavlodar oblysynyń Ýspen aýdanynda jáne Pavlodar qalasynda birqalypty ylǵaldy jaǵdaı kútiledi. Al basqa óńirlerde ylǵal mólsheri osy aı úshin qalypty bolady.
Eskeretin jaı, «Qazgıdromet» mamandary qazir tek aldyn ala boljam jasalǵanyn, aqparattar alda taǵy naqtylanatynyn aıtady. Shilde aıynyń boljamy 15 maýsymda, al tamyzǵa arnalǵan boljam 15 shildede jarııalanady. Al qazirgi qolda bar aqparattarǵa zer salsaq, bıyl jazdaǵy aýa raıy, topyraqtyń ylǵaldylyǵy qalypty deńgeıde saqtalatynǵa uqsaıdy.