Belarýs astanasy Mınsk qalasynda eki el Úkimet basshylarynyń birinshi orynbasarlary Roman Sklıar men Nıkolaı Snopkovtyń tóraǵalyǵymen saýda-ekonomıkalyq yntymaqtastyq jónindegi Qazaqstan-Belarýs Úkimetaralyq komıssııasynyń 18-otyrysy boldy.
Is-sharaǵa eki eldiń jaýapty memlekettik organdarynyń ókilderi qatysty. Nátıjesinde, ónerkásip, kólik, qurylys, bilim jáne ǵylym sııaqty negizgi salalardaǵy yntymaqtastyq úshin jańa múmkindikter ashatyn hattamaǵa qol qoıyldy.
Qazaqstan men Belarýs ónerkásiptik kooperasııany odan ári nyǵaıtýdyń úlken áleýetine ıe bolǵandyqtan, ónerkásip salasyndaǵy ózara is-qımylǵa erekshe nazar aýdaryldy. Eki el ekonomıkasy úshin mańyzdy sanalatyn kólik jáne qurylys salasyndaǵy birlesken jobalar da aıqyndaldy.
Bilim jáne ǵylym salasyndaǵy birlesken jumys jas ǵalymdar men mamandar úshin jańa múmkindikter ashady. Tájirıbe men ınnovasııalyq ıdeıalar almasýǵa yqpal etedi.