Saltanatty rásim «Atameken» etnomemorıaldyq kesheninde Qazaqstan Respýblıkasynyń Memlekettik rámizderi kúni ótti, dep habarlaıdy Egemen.kz Qorǵanys mınıstrliginiń baspasóz qyzmetine silteme jasap.
Oǵan Qorǵanys mınıstrliginiń, Ulttyq qaýipsizdik komıtetiniń, Ishki ister mınıstrliginiń, Tótenshe jaǵdaılar mınıstrliginiń basshylyǵy, áskerı oqý oryndarynyń basshylyq quramy, Qarýly kúshterdiń ardagerleri, kýrsanttar men túlekterdiń týystary qatysty.
Saǵadat Nurmaǵambetov atyndaǵy Qurlyq áskerleri áskerı ınstıtýtynyń túlekteri Baýyrjan Alpysbaev pen Imanjúsip Asylbekov, Radıoelektronıka jáne baılanys áskerı-ınjenerlik ınstıtýtynyń túlekteri Bekjan Daıyrbaı men Dıas Omar Prezıdent Qasym-Jomart Toqaevtyń qolynan ofıserlik pogondardy alý múmkindigine ıe boldy.
«Áskerı ınstıtýttan «ınjenerlik qamtamasyz etý» baǵdarlamasy boıynsha bilim aldym. Ýaqyt tez ótip ketti. Endi biz úshin qyzmettiń jańa kezeńi bastalady. Leıtenanttyq pogondy Qarýly kúshterdiń Joǵarǵy Bas qolbasshysynyń qolynan alýdyń jaýapkershiligi joǵary. Maǵan kórsetilgen bul senimimdi aqtaýǵa tyrysamyn», dedi túlek Imanjúsip Asylbekov.
Aıta ketý kerek, pogondardy saltanatty túrde tapsyrý rásimine úzdikterdiń úzdikteri keldi. Olardyń arasynda halyqaralyq pándik olımpıadalardyń júldegerleri, sport sheberleri men úmitkerler bar.
Qorǵanys mınıstri general-polkovnık Rýslan Jaqsylyqov oqý úzdikteri Qurlyq áskerleri áskerı ınstıtýtynyń túlekteri Danııar Ǵabıden men Tımýr Qazısovke, Radıoelektronıka jáne baılanys áskerı-ınjenerlik ınstıtýtynyń túlekteri Almaz Dúısenbaev pen Qanat Muratovqa leıtenant pogondaryn tabys etti.
«Áskerı istegi kıberqaýipsizdik» mamandyǵyn aldym. Oqý barysynda baǵdarlamalaýdy meńgerdim. Bıyl TMD elderi arasynda ınformatıkadan ótken halyqaralyq olımpıadaǵa qatysý biz úshin mańyzdy oqıǵa boldy. Onda biz júldeli orynǵa ıe boldyq. Árıne, men leıtenant pogonyn Qorǵanys mınıstriniń qolynan alǵanyma qýanyshtymyn. Bul – úlken senim. Men sol senimdi aqtaýǵa tyrysyp, adal qyzmet etemin», dedi leıtenant Almaz Dúısenbaev.
Sonymen birge Qorǵanys mınıstri Sh. Ýálıhanov atyndaǵy áskerı kolledjdiń túlekteri Álisher О́telbaev pen Beglan Temirhanǵa, armııa generaly S. Nurmaǵambetov atyndaǵy áskerı kolledjdiń túlekteri Maqsat Azyqanov pen Nurbol Jumabaıǵa da kishi serjant pogondaryn tabys etti.
General-polkovnık Rýslan Jaqsylyqov túlekterdi tarıhı oqıǵamen quttyqtap, Otanyna adal qyzmet etýge tilek bildirdi.