60 kg salmaq dárejesinde Parıj Olımpıadasynda Qazaq eli namysyn qorǵaýǵa kimniń laıyq ekenin anyqtaý maqsatynda Qazaqstan dzıýdo federasııasy (QDF) úmitker úsh balýannyń arasynda ózara beldesýler ótkizýdi qup kórip otyr.
Sonymen, 7 maýsymda Almatyda Nurqanat Serikbaev, Eldos Smetov jáne Maǵjan Shamshadın tatamıge shyǵady. Úsheýiniń de olımpıadalyq reıtıngtegi esebi túgel. Úzdikter tiziminde olar mynadaı oryndarǵa jaıǵasty: Nurqanat – 15, Eldos – 22 jáne Maǵjan – 24. Osy dzıýdoshylar arasyndaǵy eń ataqtysy – Smetov. 31 jastaǵy Jambyl oblysynyń týmasy Rıo Olımpıadasynyń kúmis, Tokıo Olımpıadasynyń qola júldegeri. Álem chempıonatynda úsh ret jeńis tuǵyryna kóterilip, bir altyn men eki qolany qanjyǵasyna baılady. Sondaı-aq Eldos – Azııa oıyndarynyń jeńimpazy jáne qurlyq chempıony.
27 jastaǵy Maǵjan – jastar arasyndaǵy álem birinshiliginiń jeńimpazy. Ol Grand-Slem týrnırlerinde 1 altyn, 1 kúmis jáne 2 qola medaldy ıelenip, Gran-prı jarysynda dara shyqty. Syr boıynyń sańlaǵy byltyr jaraqat alýyna baılanysty alty aıdan asa emdelip, taıaýda qatarǵa qaıta qosyldy. Oralǵan bette Dýshanbedegi dodada kúmis alsa, Astanadaǵy saıysta jeńilis tapty. Al Atyraý oblysynda dúnıege kelgen Nurqanattyń jasy – 21-de. Kezinde ol jasóspirimder arasynda álem jáne jastar arasynda Azııa chempıony atandy. Byltyr ǵana eresekter dýyna qosylǵanyna qaramastan daryndy dzıýdoshy birden táýir nátıje kórsete bastady. Serikbaevtyń eń úzdik kórsetkishi – 2023 jyly Tashkenttegi týrnırde kúmis jáne bıyl Tbılısıdegi tartysta altyn medaldy oljalaýy. Mine, osy úsh sportshymyz bir-birimen kúresip, solardyń arasynan úzdik shyqqany Parıj Olımpıadasynda óner kórsetedi.
Osydan týra 20 jyl buryn dál osyndaı jaǵdaıdyń kýási bolǵan edik. 2004 jyly Afınada ótken Olımpııa oıyndary qarsańyndaǵy dzıýdoshylardyń irikteý básekeleri kezinde 66 kg salmaqta Erlan Silıambaev, Muratbek Qypshaqbaev jáne Arsen Hatıp bir-birimen aıyzdary qanǵansha aıqasty. Bul tartys Qypshaqbaevtyń paıdasyna sheshildi. 73 kg salmaq dárejesinde úmitker ekeý edi. Olar – Ashat Shaharov pen Saǵdat Sadyqov. Qazaqtyń qos sańlaǵynyń aıqasy Sadyqovtyń paıdasyna sheshildi. Sóıtip, Muratbek pen Saǵdat ejelgi Ellada eline attandy. Mine, araǵa 20 jyl salyp, dál sondaı oqıǵa qaıtalanyp otyr.