Bokstan Qazaqstan erler quramasynyń bas bapkeri Myrzaǵalı Aıtjanov Bangkokta ótken sońǵy irikteý týrnırden keıin pikir bildirip, Muhammedsabyr Bazarbaıulynyń joldama jolyndaǵy jeńisin atap ótti, dep jazady Egemen.kz Ulttyq olımpıadalyq komıtetke silteme jasap.
Bas bapker, eń aldymen, Parıj Olımpıadasyna tolyq quramda barý maqsaty oryndalǵanyna nazar aýdardy.
«Endigi maqsat – jigitterimiz rıngte baryn salyp, elge abyroımen oralsaq degen oı. Muhamedsabyrdyń joldama alǵanyna óte qýanyshtymyn. Oǵan ońaı bolǵan joq.
Eki irikteý jarysy da jigitterge qıyn soqty. Bangkoktegi týrnırden soń da myqty degen boksshylar joldamasyz qaldy. Boks bes qurlyqta da damyp jatyr. Sondaqtan, árbir kezdesý fınaldyq jekpe-jekten kem emes. Bazarbaıuly alty kezdesý ótkizip, lısenzııa alyp otyr. Oǵan tek jaraısyń deımiz», dedi Myrzaǵalı Qulanuly.
Sondaı-aq ol tórtjyldyqtyń basty básekesine daıyndyq pen jattyǵý jıyndary tyńǵylyqty júrip jatqanyn málimdedi.