Keshe Májilistiń jalpy otyrysynda byltyr 27 qarashada Astanada qol qoıylǵan Qazaqstan men Qytaı Úkimetteri arasyndaǵy teń negizde mádenı ortalyq ashý týraly kelisim ratıfıkasııalandy. Bul qadam eki el arasyndaǵy dostyq qarym-qatynasty nyǵaıtýǵa, mádenı-gýmanıtarlyq saladaǵy yntymaqtastyqty damytýǵa baǵyttalǵan.
Kelisim aıasynda eki el astanasy Astana men Beıjińde mádenı ortalyqtar ashylady. Bul mekemeler eki memleket akkredıttegen, qabyldaýshy taraptyń zańnamasy aıasynda áreket etetin, kommersııalyq emes uıymdar retinde jumys isteıdi.
Mádenıet jáne aqparat mınıstri Aıda Balaeva mádenı ortalyqtardy ashý Qazaqstan men Qytaı arasyndaǵy ózara mádenı baılanysqa jańa serpin beretinin atap ótti. «25–27 aqpan kúnderi Qytaıǵa barǵan saparymyzda bolashaq nysannyń ornalasatyn jerimen tanystyq. Beıjińde aýdany shamamen 730 sharshy metrge deıin jetetin bizdiń mádenı ortalyq «Art-zona 798» mekenjaıynda ashylady. Ǵımarattyń 1-qabatynda qazaq halqynyń tarıhı-mádenı murasynyń elementterin qamtıtyn murajaı ekspozısııa zaly bolady. Ekinshi qabatta konferens-zal, oqý zaly jáne kitaphanadan turatyn kórme alańy ornalasady», dedi mınıstr Májilistiń jalpy otyrysynda.
Beıjińdegi Qazaqstan mádenı ortalyǵynyń negizgi qyzmet baǵyttaryna oqý zaly, kovorkıng aımaǵy, kelýshilerge arnalǵan ulttyq elektrondyq kitaphana, otandyq BAQ, oqý oryndarynyń saıttary qoljetimdi bolady. Sonymen birge qazaq tili kýrstaryn ótkizý, Qazaqstan tarıhyna qatysty turaqty jáne jyljymaly kórmeler uıymdastyrý, vırtýaldy murajaı (3D-týrlar), konferensııalar, semınarlar, sımpozıýmdar ótkizý, Qazaqstannyń kórkemdik ujymdary men jekelegen oryndaýshylarynyń óner kórsetýine múmkindik týǵyzý, qazaq fılmderi kórsetilimin uıymdastyrý da qolǵa alynbaq.
Elimizdiń mádenıetin nasıhattaý jáne sheteldegi týrıstik áleýetti damytý da Beıjińdegi Qazaqstan mádenı ortalyǵynyń negizgi qyzmetine kiredi.