Aqmolada tirkelý merzimi uzartyldy. Negizgi ulttyq biryńǵaı testileýge ótinish 6–14 mamyr aralyǵynda qabyldanǵanymen, kóktemgi sý tasqynyna baılanysty tótenshe jaǵdaı jarııalanǵan óńirlerde ýaqyty uzartyldy.
Kóktemgi sý tasqyny kezinde oblystyń Atbasar, Astrahan, Esil, Selınograd, Bulandy, Arshaly aýdandaryndaǵy birqatar bilim oshaǵy zardap shekken bolatyn. Ile oqý úderisi onlaın júrgizildi. Bıyl ulttyq biryńǵaı testileýde osy jaǵdaı eskerilip, túlekterdiń daıyndalýyna ýaqyt berildi. Ata-analardyń pikirinshe, bul – túlekterge jasalǵan táp-táýir qamqorlyq.
«Ulttyq biryńǵaı testileý merziminiń uzartylýy jaqsy boldy», deıdi Atbasar aýdanynyń turǵyny Nurlan Alpysbaev. – Bul sheshimdi eń aldymen túlekterge jasalyp otyrǵan janashyrlyq dep qabyldaýymyz kerek. Ata-analar árqashan balalarynyń bolashaǵyn oılaıdy emes pe?»
Ulttyq biryńǵaı testileýge ótinish bergenderdiń bilimin qapysyz sarapqa salýǵa barlyq jaǵdaı jasalǵan. Túlekterdi tasymaldaıtyn kólik, jatyn jerleri talapqa saı.
«Sý tasqynynan zardap shekken Atbasar aýdanynyń túlekterinen ulttyq biryńǵaı test tapsyrýǵa 1566 ótinish tústi», deıdi Kókshetaý qalasynyń ulttyq testileý ortalyǵy fılıalynyń jetekshisi Qýanysh Muhamedjanov. – Al Kókshetaý qalasynan 6139 ótinish qabyldandy. Aqmola oblysynda atalǵan óńirlerde tirkelý merzimi uzartyldy. Ulttyq biryńǵaı testileý 3 maýsym – 12 shilde aralyǵynda ótkiziledi.
Fılıal jetekshisiniń aıtýyna qaraǵanda, jaýapty naýqan utymdy uıymdastyrylyp otyr. Elorda irgesindegi sý tasqynynan zardap shekken bilim oshaqtarynyń túlekteri ulttyq biryńǵaı testileýdi Astana qalasynda tapsyrmaq. Taǵy bir aıta ketetini – Ǵylym jáne joǵary bilim mınıstrliginiń sheshimimen 2024 jyly talapkerler negizgi ulttyq biryńǵaı testini eki ret tapsyryp, eń úzdik nátıjesimen grant konkýrsyna qatysa alady.
Aqmola oblysy