Fýtboldan Qazaqstan ulttyq quramasynyń bas bapkeri Magomed Adıev qyzmetinen ketip, onyń ornyna Stanıslav Cherchesov keldi. Sóıtip, Reseıdiń bir mamanyn ekinshisi almastyrdy. Otandyq fýtbol federasııasynyń (QFF) bul sheshimi durys pa, álde burys pa ony ýaqyt kórsetedi.
1977 jyly Groznyıda dúnıege kelgen Magomed Adıev ulttyq quramanyń tizginin 2022 jyly ustady. Onyń basshylyǵymen 21 ret jasyl alańǵa shyqqan jerlesterimiz 11 matchty óz paıdasyna sheshti. Toǵyz márte utylyp, taǵy bir oıynda teń esep tirkeldi. Eń basty tabysymyz – Ulttar lıgasynyń V dıvızıonyna joldama alýymyz. Bul týrnırde bizdiń fýtbolshylar Ázerbaıjan, Slovakııa jáne Belarýs quramalarynan basym tústi.
Adıev jetekshilk etken tusta fýtbolshylarymyz jaqsy óner kórsetkenin joqqa shyǵarmaımyz. Ásirese 2024 jylǵy Eýropa chempıonatynyń irikteý týrnırindegi oıyndary óte áserli boldy. Syrt alańda Slovakııa (1:0) men Fınlıandııaǵa (2:1) san soqtyrdyq. «Astana Arenada» dańqty Danııadan 0:2 esebimen utylyp jatyp, úzilisten keıin qarsylastar qaqpasyn qatarynan úsh márte dál kózdep, sensasııalyq nátıje tirkedik – 3:2. Matchtyń 73 mınýtynda Bahtıer Zaınýtdınovtiń penaltıden, 86 jáne 89 mınýttarda Ashat Taǵybergen men Abat Aıymbetovtiń soqqan ǵalamat goldary jaıynda jankúıerler áli kúnge deıin tańdana áńgimelep júr. Eger sońǵy kezdesýde Slovenııany utqanymyzda, «Eýro-2024» jarysynyń joldamasy qorjynda edi. Biraq ondaı baq bizge buıyrmady.
Irikteý týrnır barysynda 10 oıynnan keıin 18 upaı jınadyq. Bul – biz úshin buryn-sońdy bolmaǵan kórsetkish. О́z tobymyzda tórtinshi oryn alyp, pleı-offta kúsh synasýǵa múmkindik aldyq. Biraq sheshýshi básekede jolymyz bolmady. Bul mejede azýly Grekııa 5:0 esebimen tas-talqanymyzdy shyǵardy. Desek te, qart qurlyqtyń basty dop dodasyna bir taban jaqyndaı túsýimiz barsha kórermenge keremet emosııalar syılady. Eń bastysy, halyq qaıta fýtbol kóre bastady. Oǵan dálel – ulttyq komandamyz jasyl alańǵa shyqqanda «Astana Arenada» bos oryn tabylmaıtyn. Fýtbol óneri elimizde qaıta tirilgendeı bolyp, bizde de dop tebe alatyn jaqsy oıynshylardyń baryna anyq kóz jetkizdik.
Osydan biraz ýaqyt buryn Magomed Musauly qyzmetinen ketetinin málimdedi. О́ziniń osy sheshimin otbasylyq jaǵdaıymen baılanystyrdy. Onyń ústine Adıev bıylǵy jyldyń sáýir aıynda Groznyıdyń «Ahmat» klýbynyń tizginin ustap úlgerdi. Endi onyń ornyna kelgen Stanıslav Cherchesov jaıynda ne bilemiz?
Stanıslav Salamuly 1963 jyly Alagırde týdy. Soltústik Osetııanyń týmasy 1982-2002 jyldar aralyǵynda Vladıkavkaz ben Máskeýdiń «Spartak», «Lokomotıv», Drezdenniń «Dınamo», Aýstrııanyń «Tırol», KSRO, TMD jáne Reseı quramalarynyń qaqpashysy boldy. Sporttyq mansabyn aıaqtaǵannan keıin Aýstrııa, Reseı, Polsha jáne Majarstannyń birqatar komandalaryn jattyqtyrdy. 2007 jyly Máskeýdiń «Spartak» klýbynyń Reseı Premer-lıgasynda kúmis medaldi enshileýine súbeli úles qosty. 2016 jyly «Legııany» Polsha chempıony etip, el kýbogin ıelendi. Sońǵy jumys orny – Býdapeshtiń «Ferensvaroshy». Osy ujymmen birge Cherchesov Majarstannyń eki dúrkin chempıony atanyp, bir ret el kýboginde bas júldeni oljalady.
2016–2021 jyldar aralyǵynda Stanıslav Cherchesov Reseıdiń ulttyq quramasynyń bas bapkeri boldy. Osy qyzmettegi onyń tabysy – 2018 jyly óz elinde ótken álem chempıonatynyń shırek fınalyna shyǵýy. Toptyq týrnırde olar Saýd Arabııasy (5:0) men Mysyrdy (3:1) utyp, Ýrýgvaıǵa (0:3) ese jiberdi. Pleı-offtyń 1/8 fınalynda Ispanııamen (1:1, 4:3) teń oınap, penaltı soǵý barysynda basym tústi. Odan keıin Horvatııamen kúsh synasty. Shırek fınaldyń da taǵdyry «sporttyq lotereıa» arqyly sheshildi. Negizgi ýaqytta jeńimpaz anyqtalmady – 2:2. Al 11 metrlik núkteden horvattar dáldik tanytty – 4:3. 2020 jylǵy reseılikter «Eýro» dodasynyń irikteý týrnırinde súringennen keıin Cherchesov óz ornyn bosatty.
Shyny kerek, jergilikti mamandar men jankúıerlerdiń deni Stanıslav Cherchesovtiń Qazaqstanǵa kelýin qalamady. Biraq olardyń pikirine eshkim qulaq aspady. KFF basshylary 60 jastaǵy bapkerdi ózderi attaı qalap aldy. Keıbir derek kózderine sensek, atalǵan azamat kelsimshart boıynsha jylyna 1,2 mıllıon eýro mólsherinde jalaqy alady. Biz úshin eń mańyzdysy – Qazaqstan fýtbolynyń kósegesi kógergeni, oıynshylardyń deńgeıiniń óskeni, ulttyq komandamyzdyń álem jáne Eýropa chempıonattaryna joldama alǵany. Osyndaı asa jaýapty mindetti atqarý Stanıslav Salamulyna júktelip otyr. Jańadan taǵaıyndalǵan bas bapkerge biz aldaǵy dúbirli dodalarda sáttilik tileımiz.