Oblys ortalyǵyndaǵy qazaq tilinde bilim beretin «Jas daryn» atalatyn mektep oqý-bilimge talpynysy erekshe oqýshylar úshin 1999 jyly ashyldy. Bul kúnderi mektepte 340 oqýshy bilim alýda. Al mektep qaladaǵy burynǵydan kele jatqan tarıhı ǵımarattardyń birinde ornalasqan. Mektepte 14 oqý kabıneti bar. Hımııa, fızıka, bıologııa kabınetteri qazirgi zaman talabyna saı jabdyqtalǵan. Jalpy, oqytý úderisi jaratylystaný-matematıkalyq jáne qoǵamdyq-gýmanıtarlyq baǵytta júrgiziledi. Qoǵamdyq-gýmanıtarlyq baǵyttaǵy synyptarda aǵylshyn tili men qazaq tili tereńdetilip oqytylady. Kóptildilikti damytý baǵyty 5-synyptan bastalady. Eljandylyq, otanshyldyq, eldi súıý, patrıottyq tárbıe sabaqtary júrgiziledi. Elbasy Joldaýynda bilim berý sapasyn arttyrýdy dúnıejúzilik standart deńgeıine jetkizý basty maqsat ekeni aıtyldy. Qazir bizdiń elimizdegi kóptegen mektepterge halyqaralyq baıqaýlarǵa qatysa alamyz. Osy arqyly oqýshylardyń jetistikteri men bilimderi kórinetini sózsiz. Mekteptiń bilim berý, tárbıelik keńistigin ǵylymı jobalar, saıystar, ıntellektýaldyq marafon, kórkem shyǵarmashylyq baǵytyndaǵy jobalar quraıdy. Úzdik oqýshylary halyqaralyq, respýblıkalyq baıqaýlarǵa qatysýda. Ǵylymı jobalar jazyp, mektep qabyrǵasynda júrip, izdenispen, shyǵarmashylyqpen jumys jasaıdy. Mohamed Ál Ámir, Erkegúl Asaıyn, Tursyn Mahmud, Danııal Habıbolla, Arýjan Turǵanova, Darııa Shegen, Kúlásh Qońyrova, Álııa Aqbaeva jáne basqa ul-qyzdarymyz mekteptiń maqtanyshtary. Bilimdi, kóp til biletin bolashaqtyń mamandary erjetip keledi degen sóz.
– 2009 jyly mektep ǵımaratynan bólek sport zal salyndy. Oqýshylar deneshynyqtyrý sabaǵyna barý úshin eki arada júrdi. Sodan beri oblys ákimdigine oqý ǵımaraty men sport zaldyń arasyn qosatyn ótpeli aralyq galereıanyń salynýyn surap birneshe ret ótinish jazdyq, – deıdi mektep dırektory Sáýle Hasanova.
Sóıtip, arada 6 jyl ótkende ustazdar, ata-analar, oqýshylar ótinishi oryndaldy. Oblys ákimdigimen ERG S.a.r.l. ózara yntymaqtastyq jónindegi memorandýmynyń arqasynda bıyl «Jas daryn» mektebiniń aralyq galereıasyn salý úshin demeýshilik jasalyp, qarjy bólindi.
– Biz demeýshilerge, oblys ákimdigine alǵys bildiremiz. Mektep pen sport zaldyń arasyn qosatyn aralyq galereıamyzdan oqýshylarymyzdyń kóńildi daýystaryn estý bizder úshin de, ata-analar úshin de qýanysh, – deıdi «Jas daryn» mektebiniń ustazdary.
Farıda BYQAI,
«Egemen Qazaqstan».
PAVLODAR.