Ekijaqty taktıkalyq-arnaıy oqý-jattyǵýlar Qazaqstan men Tájikstan Qarýly kúshteri áskerı qyzmetshileriniń qatysýymen ótip jatyr. Is-qımyldar «Magob» oqý ortalyǵynda uıymdastyryldy, dep habarlaıdy Egemen.kz QR Qorǵanys mınıstrliginiń baspasóz qyzmetine silteme jasap.
Qazaqstan Desanttyq-shabýyldaý áskerleri men qabyldaýshy taraptyń arnaıy maqsattaǵy bólimsheleriniń áskerı qyzmetshileri taýly jerlerde oqý-jaýyngerlik mindetter keshenin pysyqtaıdy.
«Birlesken oqý-jattyǵýdy ótkizý týraly sheshim osy jyldyń sáýir aıynda Dýshanbede ótken shtabtyq kelissózderde qabyldanǵan edi. Kezdesýde taraptar Ortalyq Azııa óńirindegi terrorıstik jáne dinı-ekstremıstik uıymdardyń qyzmetine baılanysty áskerı-saıası jaǵdaıdy, qaýip-qaterler men syn-tegeýrinderdi talqylady. Osyǵan sáıkes oqý-jattyǵýdyń mazmuny ázirlenip, taýly jerde urys júrgizý tásilderi modeldendi», dep málimdedi QR Qorǵanys mınıstriliginiń ókilderi.
Oqý-jattyǵýlardy ótkizý maqsaty - bólimshelerdiń dalalyq daǵdylaryn jetildirý, taýly jerde arnaıy is-sharalardy oryndaý kezinde komandırlerdiń bólimshelerdi basqarýda tájirıbe alýy, sondaı-aq eki el Qarýly kúshteriniń bólimsheleri arasyndaǵy ózara is-qımyl men tájirıbe almasý.
Aıta keteıik, oqý-jattyǵý 9 maýsymǵa deıin ótedi.
Qyrmyzy JUMAǴALIQYZY,
EUÝ stýdenti