Jalpy, talantty adamdardyń tabıǵaty erekshe. Bolmystary da qarapaıym jurttan tym bólek. Shyǵarmashyl jannyń eshbir sheńberge syımaıtyn bul «bóten» minezi bireýge qyzyq, bireýge oǵash, endi bireýge úlgi, bireýge kúlkili kórinedi. Al dál osyndaı tıptegi adamdarda nelikten dál osyndaı «birtúrlilik» bolatynyn eshqandaı ǵylym áli zerttep tapqan joq. Bar anyqtamasy, ol – óner adamy.
Et jemeıdi, balkonda uıyqtaıdy
Sýretshi Ilıa Repın et jemeıtin. Vegetarıandyq ustanymyna berik bolǵany sonshalyq, úıine qonaq kelse de dastarhanǵa et qoımaıdy. Dese de úı ıesiniń bul erejesinen aılasyn asyrǵan qonaqtar etti taǵamdardy tyǵyp ákeledi. Túnde sýretshiden jasyryp jeý de qıyn emes edi. О́ıtkeni Repın árqashan taza aýada, balkonda uıyqtaıtyn. Qysta da, jazda da.
Qaltada – qarý
О́zi buzyq, ózi erke Pablo Pıkasso uıqy men gıgıenadaǵy birtúrli ǵadetterimen kózge túspedi. Biraq ıspandyq sýretshi serýenge shyqqanda ylǵı revolverin alyp, qaltasyna salyp júripti. Al tańǵa jýyq Bato-Lavýarǵa oralǵanda qyzyq úshin aspanǵa oq atady. Negizinde ony túsinýge bolady.
Kilt ustaǵan Dalı
Uıqy – jalpyǵa ortaq rejim. Bárimiz kózimizdi jumyp, birdeı uıyqtaıtyn sııaqty kórinemiz. Biraq, shyn máninde, árkim ártúrli uıyqtaıdy. Ásirese shyǵarmashyl jandar úshin uıqy – óz álemindegi qyzyq bir keńistik syndy. Máselen, óz zamanynyń eń birtúrli adamdarynyń biri – Salvador Dalı qarapaıym adam sııaqty uıyqtaı almaıtyn. Sýretshi kóbinese qolyna kilt ustap, tósekke jatatyn. Denesi bosap, shyndap uıqyǵa ketkende kilt qolynan túsip, dybysynan oıanatyn bolǵan. Bul eshqandaı mazohızm emes. Bul – shyǵarmashylyqqa degen súıispenshilik. О́ıtkeni Salvador Dalı osylaısha kórgen túsin qaǵazǵa túsirip, odan shabyt alyp, taǵy bir shedevr jasaı aldy.
Tórt saǵatta – 20 mınýt
Uıqy degende Leonardo da Vınchıdi de aıtpaı kete almaımyz. Onyń uıqy júıesi rasynda da mazohızmge uqsaıdy. Sýretshi ózine ár tórt saǵat saıyn 20 mınýt uıyqtaýǵa ruqsat berdi. Bul, árıne, ónimdi jumys isteýdiń amaly. Da Vınchıge qatysty bul aqparattyń qanshalyqty shyndyqqa sáıkes keletini belgisiz. Ol ómir boıy osylaı uıyqtady ma, álde mundaı tájirıbelerdi qıyn sátterde de ǵana qoldandy ma? Jumbaq.
Uzaq jasaýdyń «syry»
Al jeke gıgıena ár adam árqashan saqtaýy kerek jalpyadamzattyq iske jatady. Deımiz ǵoı. Biraq ıtalııalyq músinshi Mıkelandjelo barshaǵa belgili bul ustanymnan tym alshaq boldy. Ol únemi etikpen, kıimmen uıyqtaıtyn. Tipti onysyn birneshe apta boıy aýystyrmaı júre beretin. Al jýý degendi múldem atamańyz. Oıyna da kelmegen.
Sóıtken áıgili Mıkelandjelo 87 jas jasady. Músinshiniń uzaq ómir súrýiniń qanshalyqty gıgıenamen baılanysty ekenin bilmeımiz, biraq bul bir kúlkili kezdeısoqtyq eken.
Tym shynaıy sýretshi
Karavadjo shyǵarmasynyń shynaıy shyǵýyna tyrysqany sonshalyq, «Lazardyń tirilýi» kartınasynda ólgen adamdy paıdalanǵan. Sýretshi zırat qyzmetkerlerine úsh kún buryn jerlengen adamnyń denesin qazyp alýdy tapsyrǵan. Dál osy jumysshylar ólgen adamdy sýretshige kerekti formada ustap turǵan. Al Karavadjo esh alańsyz qylqalamyn qolyna alyp, shabyttana iske kiristi.
Árıne, óner qurbandyqty talap etedi. Eń bastysy, shyǵarmashylyq úshin eshkimdi óltirmegen abzal.