UFC-de óner kórsetip júrgen asa jeńil salmaqtaǵy qazaqtyń tanymal aralas jekpe-jek sheberi Azat Maqsum óziniń kelesi kezdesýin 3 tamyzda Abý-Dabıde amerıkalyq Sı Djeı Vergaraǵa qarsy ótkizedi.
32 jastaǵy Tehas shtatynyń týmasy mýaı-taıdyń has sheberi. Osy sport túrin ol 2012 jyldan beri serik etip keledi. Sol aralyqta 18 kezdesý ótkizip, 12 ret jeńiske jetti. Jeti básekeni merziminen buryn aıaqtady. Bıyl naýryz aıynda uıymdastyrylǵan óziniń sońǵy jekpe-jeginde ol bizdiń Asý Almabaevqa ese jiberdi. Al byltyr Vergara Danıel da Sılva men Vınısıýs Salvadorǵa san soqtyrdy.
Azat Maqsum UFC-men kelisimshartqa otyrǵanǵa deıin qatarynan 16 aıqasty óz paıdasyna sheshti. Álemniń eń myqty promoýshenindegi alǵashqy kezdesýin ol 2023 jyldyń jazynda Taıson Nemge qarsy ótkizip, qarsylasyn upaı sanymen utty. Alaıda odan keıin oıda-joqta Charlz Djonsonǵa ese jiberdi. Bul faıterlerdiń ekeýi de – AQSh-tan.
Parsy shyǵanaǵynda uıymdastyrylǵaly otyrǵan týrnırdiń basty básekesinde Ýmar Nurmagomedov Korı Sendhagenmen saıysqa túsedi. Sondaı-aq Tonı Fergıýson men Maıkl Keza, Nık Dıas pen Vısente Lıýke jáne taǵy basqa da jekpe-jekter jankúıerlerdiń kóńilinen shyǵady degen oıdamyz.