ASTANA. 25 sáýir. Osydan úsh jyl buryn ǵalamtorda «Qazaqstannan shyqqan eń jyldam qyz» atty beınerolık jarııalanǵany belgili. Shamamen 3 mıllıon ret qaralǵan vıdeoda 5 jasar pavlodarlyq Evnıka Sadvakasova boks sporty boıynsha sheberligin kórsetedi. Arada úsh jyl ótken kezde talantty qyzdyń ákesi kezekti beınerolıkti jarııalady. Bul týraly «Ekspress K» habarlady.
Jańa beınerolıkte de Evnıka burynǵydaı joǵary deńgeıde tehnıkalyq sheberligin pash etedi. Ákesi Rýslan Sadvakasovtyń aıtýynsha, qyzynyń tehnıkasy men soqqysyna mamandar joǵary baǵa bergen. Tipti keıbir kásipqoı boksshylardyń ózin jolda qaldyrady eken.
«Evnıka soqqy tehnıkasyn úıretetin jattyǵý sparrıngterine qatyspasa da, sheberligi asa joǵary deńgeıde. Men barlyq balalaryma bokstyń qyr-syryn úıretip, osy sportqa baýlydym. Biraq meniń jattyqtyrýshylyq ádisim boıynsha olar 15 jasqa deıin sharshy alańǵa shyqpaıdy. Áıtpese, balanyń psıhıkasyna zaqym keledi. Máselen, Anja esimdi qyzym tek eseıgen kezde ǵana jarystarǵa qatysa bastady. Aıtpaqshy, ol Reseıde eresekter arasynda ótken kýng-fýdan halyqaralyq týrnırde úshinshi oryn aldy. Buǵan erekshe nazar aýdaryp otyrǵan sebebim, Anja oǵan deıin tipti jattyǵý sparrıngterine de qatyspaǵan edi. Mektepte qatarlastary qyzdarymdy eshqashan renjitpeıdi. О́ıtkeni, olardyń qandaı deńgeıdegi sheber sportshy ekenin bári biledi», – deıdi qyzdaryn sportqa baýlyǵan áke.
Bir qyzyǵy, Rýslannyń balalarynyń esimderi óte erekshe. Máselen, qyzdarynyń esimderi: Adelaıda, Hatshepsýt, Selıavıra jáne Anja. Sondaı-aq, Aınzı Makasıı esimdi uly bar. О́ziniń aıtýynsha, qyzdaryna ejelgi qudaılardyń esimderin bergen. Al ulynyń esimi japon halqynyń qurmetine qoıylǵan.
«Balalarymnyń qujattaryn rásimdeý úshin AHAJ-ǵa barǵanymda, ol jerdegiler kúlgen edi. Biraq tıisti qujattardyń barlyǵyn rettep aldym. Meniń bul áreketimdi áıelim Anııa da qoldady», – deıdi Rýslan.
Aıta keteıik, Anııa – akrobatıkadan Qazaqstan chempıony. Al Rýslan – bokstan sport sheberligine úmitker. Olardyń qyzdarynda ózderiniń qupııa qarýlary bar eken. Naqty aıtar bolsaq, ákeleri biregeı jattyǵý espanderin oılap tapqan. Atalǵan jattyǵý quraly adamnyń bulshyq etiniń reaksııasyn óte joǵary deńgeıde jetildiredi. «Biz ol quraldy evnık dep atadyq. Onymen jattyqqan kezde soqqynyń jyldamdyǵy adamnyń refleksimen bir deńgeıde jetiledi. Ol jattyǵý quralyn búginde AQSh, Avstralııa jáne Batys Eýropadan adamdar arnaıy kelip satyp alady», – deıdi balalarynyń ómirin sportpen órgen Rýslan Sadvakasov.
Elaman Qońyr.
Derek, sýret: «Ekspress K».