Qurban aıt

Aıt merekesi qarsańynda Kókshetaýdyń mal bazaryna malsaq qaýym ákelýin ákeledi. Biraq qarbalas. Baǵasy da eptep qymbattaıdy. Jumsaıtyn adam tabý bir mashaqat. Qalaǵa jaqyn jerdegi túp naǵashymyz Kóben aqsaqaldyń shańyraǵyna at basyn tiredik. О́zi bir baýyrmal kisi. Qashan kelseń de, qaýqyldap qarsy alady. Esik aldynda júr eken. Mal-jannyń amandyǵyn surastyq. Birden ishke ozdyq. Apaıymyzdyń qoıý shaıyn iship otyryp, Qurban aıtqa mal izdep shyqqan jónimizdi aıttyq.

«E, mal tabylady ǵoı, – dedi Kóben aqsaqal, – bes-alty isegim jarty jyldan beri jemde tur. Endigi qabyrǵasy jabylǵan shyǵar».

Dastarqan basynda túp naǵashy­myz­dyń jamaǵaıyny, ótken jyly oblys ortalyǵyndaǵy ýnıversıtetti bitirgen jas jigit otyrǵan. Áńgime bolsyn dedi me, Qurban aıttyń mánin surady. Dál osy saýaldy kútip otyr­ǵandaı Kóben aqsaqal kósile sóılep ketti.

«Kónekózderdiń aıtýyna qaraǵanda, qurban shalý pendeniń aldyna qoıǵan asqaraly maqsatyna jetý úshin tula boıyndaǵy kúsh-jigerin, tirnektep jı­naǵan baılyǵyn, den­saýlyǵyn qurban etýge ázir ekenin bildiretin jaı bolsa kerek. Onyń ústine kórshiń ash otyrǵanda qarny toq bolǵan adam musylman emes deıtin támsil bar. Negizi Qurban aıt merekesi kezinde áleýmettik teńsizdiktiń belgileri joıylady. Dáýletti adamdar bosaǵasyna bitken yrystyń juqanasymen bólisýge tyrysady. Baǵzy zamanda úıir-úıir maldyń qurbandyqqa jumsalǵany týraly derekter bar ǵoı. Ol bizdiń halyqtyń jomarttyǵyn, baýyrmaldyǵyn kórsetse kerek. Mine, sondyqtan bul kúnderi baıdyń da, kedeıdiń de dastarqany toq bolmaq. Osy ýaqytqa deıingi aǵaıyn arasyndaǵy túsinispeýshilikten týyndaǵan kóńil kirbińi merekeniń shýaǵymen shaıylyp, tazarmaqshy.

Jamaǵaıyny ǵana emes, bárimiz tushyna tyńdadyq. Nesin aıtasyz, jany jomart túp naǵashymnyń úıinen at minip, atan jetektegendeı oljaly oraldyq. Qurbanǵa shalar mal tabyldy ári merekeniń mánin jas tolqynnyń sanasyna sińirdi. Eń bastysy da sol. Aqyl tarazysyna salsańyz, az dúnıe emes qoı.

Kókshetaý