11 maýsymnan bastap bir aı boıy «Qaınar» bilim berý jáne bos ýaqytty qamtý kesheniniń aýmaǵynda oqýshylar qazaq halqynyń baı mádenıeti men salt-dástúrlerimen tanysady, dep jazady Egemen.kz.
«Shańyraq» etnoqalashyǵy №7, 16, 18, 22, 25, 33 mektepteriniń alty kıiz úılerinen turatyn keshen.
Etnojoba «Dostyq úıi» KMM, «Atamura» UMO, qalalyq ólketaný murajaıy, Jastar bastamalaryn damytý ortalyǵy jáne «Ekibastuz» QBQ qoldaýymen iske asyrylyp otyr.
Kıiz úılerden turatyn etnoqalashyqty uıymdastyrý qazirgi tańda ózekti. Bul joba oqýshylardyń mádenı, rýhanı damýyna yqpal etedi. Bolashaq urpaq ultymyzyń salt-dástúri, mádenıetimen jaz aıynda tanysyp, demalystaryn qyzyqty ótkizedi.
«Etnoqalashyq aıasynda qazaqtyń qolóneri, mýzyka, bı jáne aspazdyq boıynsha sheberlik sabaqtar men bilim berý sabaqtary ótkiziledi. Balalar ınteraktıvti aımaqtar, kórmeler men sheberlik sabaqtar arqyly qazaq halqynyń dástúrleri men qolónerimen tanysýǵa biregeı múmkindik alady, balalar dástúrli qazaq oıyndaryn oınap, saıystarǵa qatysady, taza aýada altybaqan teýip, ulttyq taǵamdardan dám tatyp, ýaqyttaryn tıimdi ótkizedi», dedi Ekibastuz qalasy bilim bóliminiń basshysy Laýra Dısıýpova.
«Jobanyń negizgi maqsaty qazaq mádenıeti týraly bilimdi arttyrý, shyǵarmashylyq daǵdylardy damytý, belsendi demalys ótkizý. Etnoqalashyqqa qatysý balalarǵa qazaq halqynyń dástúrleri, qolóneri, mýzykasy men aspazdyǵy týraly tereń bilim alýǵa, túrli sheberlik sabaqtar arqyly shyǵarmashylyq qabiletterin damytady», dep atap ótti «Qaınar» kesheniniń basshysy Valentına Klepısa.
Biregeı joba qalanyń bilim berý mekemeleriniń 4-6 synyp oqýshylary arasynda 600 balany qamtıdy. Jobany iske asyrýǵa mektep dırektorlarynyń tárbıe isi jónindegi orynbasarlary, aǵa tálimgerler, «Qaınar» kesheniniń qosymsha bilim berý pedagogteri men ádiskerleri qatysty.